GENTAMISIN SULFAT inyeksiya uchun eritma 1ml 40mg/ml N10

Mushak ichiga yuborilgandan so'ng in'ektsiya joyidan tez so'riladi va maksimal kontsentratsiyaga 30-60 daqiqadan so'ng erishiladi. Plazma oqsillari bilan bog'lanishi past (0-10%). Hujayradan tashqari suyuqlikda, organizmning barcha to'qimalarida taqsimlanadi. Yo'ldosh orqali o'tadi. Metabolizmga uchramaydi va asosan buyraklar orqali chiqariladi (bunda siydikda yuqori kontsentratsiya hosil bo'ladi), oz miqdori safro bilan ajralib chiqadi. Yarim chiqarilish davri 2-4 soat.

Aminoglikozidlar guruhiga kiruvchi antibiotik. Bakteriya ribosomalarida oqsil sintezini susaytirish orqali bakteriostatik ta'sir ko'rsatadi. Grammanfiy aerob bakteriyalarga - ichak tayoqchasi, shigella, salmonella, enterobakteriyalar, klebsiella, protey, ko'k yiring tayoqchasiga nisbatan yuqori faollik namoyon qiladi. Preparat shuningdek grammusbat aerob kokklarga - stafilokokklarga (shu jumladan penitsillinga chidamli), streptokokklarning ba'zi shtammlariga nisbatan faol. Oqish treponema, meningokokklar, anaerob mikroorganizmlar preparatga chidamli.

Ko'ngil aynishi, qusish, qonda jigar transaminazalari va bilirubin kontsentratsiyasining oshishi; allergik reaksiyalar (teri toshmasi, qichishish, isitma); qon manzarasi o'zgarishi (anemiya, leykopeniya, granulotsitopeniya, trombotsitopeniya); bosh og'rig'i, uyquchanlik bo'lishi mumkin. Nefrotoksiklik: yengil simptomlardan (oliguriya, proteinuriya, mikrogematuriya) og'ir ko'rinishlargacha (buyrak yetishmovchiligi). Ototoksiklik: yengil ko'rinishlardan (eshitishning pasayishi, vestibulyar buzilishlar) og'ir buzilishlargacha (qaytmas karlik). Juda kam hollarda - nerv- mushak o'tkazuvchanligining buzilishi. Allergik reaksiyalar: teri toshmasi, qichishish, eshakemi, isitma, kamdan-kam hollarda – Kvinke shishi.

Parkinsonizm, miasteniya, buyrak funksiyasi buzilishlarida ehtiyotkorlik bilan qo'llaniladi. Davolash vaqtida buyrak, eshitish va vestibulyar apparatlar funksiyalarini nazorat qilish kerak. Laktatsiya davrida qo'llash zarurati bo'lganda emizishni to'xtatish kerak. Preparat bolalar ololmaydigan joyda saqlansin va yaroqlilik muddati o'tgach ishlatilmasin.

Preparatga va boshqa aminoglikozid antibiotiklarga yuqori sezuvchanlik, eshitish nervi nevriti, buyrak faoliyatining og'ir buzilishlari, uremiya, homiladorlik, laktatsiya (emizish).

Bir vaqtda yoki davolash kursi tugashi bilan darhol mikroblarga qarshi va oto- va nefrotoksik ta'sir ko'rsatuvchi boshqa preparatlarni (antibiotiklar-aminoglikozidlar, vankomitsin, sefalosporinlar, etakrin kislotasi) buyurish mumkin emas. "Halqali" diuretiklar (furosemid, etakrin kislotasi), shuningdek indometatsin bilan bir vaqtda buyurilganda qonda gentamitsin konsentratsiyasi oshadi, shu munosabat bilan toksik nojo'ya reaksiyalar rivojlanish xavfi oshadi. Ingalyatsion narkoz uchun vositalar, opioid analgetiklar bilan bir vaqtda qo'llanilganda nerv-mushak blokadasi rivojlanishi, to apnoe rivojlanishigacha xavfi ortadi. Preparatni bir shpritsda boshqa dori vositalari bilan aralashtirish mumkin emas.

Mushak orasiga va venaga qo'llaniladi. Doza infektsiyaning kechish og'irligi va lokalizatsiyasini, shuningdek qo'zg'atuvchining sezgirligini hisobga olgan holda individual belgilanadi. O'rtacha og'irlikdagi infektsiyalarda kattalar uchun preparatning sutkalik dozasi tana vazniga 3 mg/kg ni tashkil qiladi, yuborish chastotasi sutkasiga 2 marta. Og'ir infektsiyalarda sutkalik doza 5 mg/kg ni tashkil qiladi, yuborish chastotasi 3-4 marta; klinik yaxshilanishda dozani sutkasiga tana vazniga 3 mg/kg gacha kamaytiradilar. Davolash kursi - 14 kundan oshmasligi kerak. Siydik yo'llari infektsiyasi va buyrak funktsiyasi normal bo'lgan bemorlarga, zarurat bo'lganda, 7-10 kun davomida 120-160 mg dozada sutkasiga 1 marta tayinlanadi. Gonoreyada bir marta 240-280 mg tayinlanadi. Preparatni venaga infuziya qilish 1-2 soat davomida o'tkaziladi, preparat 100-200 ml 0,9% li natriy xlorid eritmasida yoki 0,5% li glyukoza eritmasida eritiladi. 2 yoshdan katta bolalar uchun doza sutkasiga 3-5 mg/kg ni tashkil qiladi; yuborish chastotasi - 3 marta. Chala tug'ilgan va yangi tug'ilgan chaqaloqlarga sutkalik dozada 5 mg/kg tayinlanadi, chastotasi - 2 marta; 2 yoshgacha bo'lgan bolalarga xuddi shunday doza sutkasiga 3 marta yuborish chastotasi bilan tayinlanadi. Kattalar va bolalar uchun maksimal sutkalik doza - 5 mg/kg. Buyrakning chiqarish funktsiyasi buzilgan bemorlarda kreatinin klirensi qiymatlariga qarab dozalash rejimini to'g'irlash talab etiladi.