LASIDOFIL WM kapsulalar N20

QO‘LLASH BO‘YICHA YO‘RIQNOMA

LASIDOFIL^®–WM

LACIDOFIL^®–WM

Preparatning savdo nomi: Lasidofil^®-WM

Dori shakli: kapsulalar

Tarkibi:

1 kapsula quyidagilarni saqlaydi:

faol moddalar: 2 mlrd tirik liofilizatlangan bakteriyalar:

Lactobacillus rhamnosus Rosell-11 – 1,9 mlrd.;

Lactobacillus acidophilus Rosell-52 – 0,1 mlrd.;

yordamchi moddalar: maltodekstrin, magniy stearati, askorbin kislotasi;

kapsula qobig‘ining tarkibi: jelatin.

Ta‘rifi: mayda och-jigarrang dog‘lari bo‘lgan, mayda dispersli oq kukundan tarkib topgan, №2 o‘lchamli, tiniq, qattiq jelatin kapsula.

Farmakoterapevtik guruhi: probiotik

ATX kodi: A07FA01

Farmakologik xususiyatlari

Laktobakteriyalar – grammusbat harakatsiz spora hosil qilmaydigan anaerob laktobasillalarni birlashtiruvchi, uglevodlarni sut kislotasigacha parchalaydigan Lactobacillaceae oilasi bakteriyalar turidir. Ular tomonidan yaratiluvchi kislotali muhit ichak biosenozi va odam organizmining boshqa normal mikroflorasining 85-95% ni tashkil etuvchi bifidobakteriyalarni rivojlanishiga yordam beradi.

Normal metabolizm jarayonida laktobakteriyalar sut kislotasini hosil qilishi, lizosim va antibiotik faollikka ega bo‘lgan boshqa moddalar: reuterin, plantarisin, laktosidin, laktolin ishlab chiqarish xususiyatiga ega. Organik kislotalar, bakteriosinlarni ishlab chiqarilishi tufayli, laktobakteriyalarning ko‘pchilik shtammlari patogen va shartli-patogen mikroorganizmlarga nisbatan yaqqol antagonistik faollikni ko‘rsatib, MIY ning rezistentligini ta‘minlaydi. Ular E. coli, H. influenzae, Campilobacter jejuni, Salmonella, Shigella, Streptococcus, Stapylococcus aureus, Helicobacter pylori kabi patogen mikroorganizmlarga nisbatan, ularni o‘sishini va enterositlarga adgeziyasini bostirishi hisobiga antimikrob ta‘sir ko‘rsatadi.

Laktobakteriyalar oqsillar, yog‘lar va murakkab uglevodlarni parchalanish jarayonida, o‘t kislotalarini metabolizmida, shuningdek K va V guruhi vitaminlarining sintezida ishtirok etishi mumkin.

Laktobakteriyalar xujayra immunitetini va immunoglobulinlarni ishlab chiqarilishini faollashtirish xususiyatiga ega. Laktobakteriyalarning immunostimulyator xususiyatini, ularning xujayra devorida, immunomodulyator ta‘sirga ega bo‘lgan peptidoglikanlar va teyxoy kislotalarini mavjudligi bilan bog‘laydilar.

Laktobakteriyalarning ushbu shtammlarini afzalligi bo‘lib, me‘da shirasi va o‘t kislotalarining ta‘siriga yuqori rezistentligi xizmat qiladi, xususan, me‘daning kislotali muhitida 30 minut davomida bo‘lganidan keyin ikkala mikroorganizmning taxminan 80% tirik qolgan. Lasidofil^®-WM da saqlanadigan bakteriyalar ichak devorining reseptorlariga birikish va 7-15 kungacha tirik holda saqlanib qolish xususiyatiga ega.

Qo‘llanilishi

• ichak mikroflorasini tiklash va normallashtirish, ovqatni hazm bo‘lishini yaxshilash;
• gastroenteritni, dispepsiyani davolash;
• ko‘pchilik antibiotiklar, ayniqsa linkomisin, klindamisin, ampisillin, amoksisiklin va sefalosporinlarni qo‘llash bilan bog‘liq bo‘lgan diareyani oldini olish va davolash. Preparat Clostridium difficile – infeksiyasini oldini olish uchun spesifik hisoblanadi.
• ovqat rasionini o‘zgarishi, safarlar va boshqa sabablar bilan bog‘liq bo‘lgan ichakning tranzitor disfunksiyalarini (ham diareya, ham qabziyat) davolash;
• sutdagi laktozaga tolerantlikni oshirish;
• surunkali toliqish sindromida holatni yaxshilash. Immunitetni va organizmning kasalliklarga nisbatan qarshiligini oshirish uchun qo‘llanadi.

Qo‘llash usuli va dozalari

Lasidofil^®-WM ovqat vaqtida, oz miqdordagi suv bilan qabul qilinadi.

3 yoshgacha bo‘lgan bolalar uchun kapsulani ochish va uning ichidagisini suv bilan yoki oldindan sovutilgan ovqat bilan aralashtirish mumkin.

Oldini olish maqsadida ichakning normal mikroflorasini bir maromda saqlab turish uchun: bolalarga 6 oylikdan boshlab 1 kapsuladan kunora, 3 yosh va undan oshgan bolalarga 1 kapsuladan kuniga 1 marta, kattalarga kuniga 1-2 kapsuladan buyuriladi. Qabul qilishning davomiyligi 20 kunni tashkil etadi.

Antibiotiklarni qo‘llash bilan bog‘liq bo‘lgan (shu jumladan Clostridium difficile tayoqchasi chaqirgan) diareyani oldini olish va davolash maqsadida: Lasidofil^®-WM ni antibiotiklarni qabul qilishdan alohida, antibiotikni qabul qilishdan 2 soat oldin yoki keyin qabul qilish kerak. 6-12 oylik bolalarga kuniga 1 kapsuladan, 1 yoshdan 3 yoshgacha bo‘lgan bolalarga 1 kapsuladan kuniga 2 marta, 3 yoshdan 12 yoshgacha bo‘lgan bolalarga 1 kapsuladan kuniga 2-3 marta, 12 yoshdan oshgan bolalar va kattalarga 1-2 kapsuladan kuniga 3 marta qabul qilish tavsiya etiladi. Qabul qilish davomiyligi antibiotiklarni buyurish muddatiga qarab belgilanadi. Antibiotiklarni qabul qilish bilan bog‘liq bo‘lgan diareyani davolashda – kasallikning simptomlari yo‘qolgunicha davom ettiriladi. Keyinchalik profilaktik qo‘llashga o‘tish mumkin.

Ovqat rasionini o‘zgarishi, safarlar va boshqa sabablar bilan bog‘liq bo‘lgan ichakning tranzitor disfunksiyalarini (ham diareya, ham qabziyatni) davolash uchun: 6-12 oylik bolalarga 1 kapsuladan kuniga 1 marta, 1-3 yoshli bolalarga 1 kapsuladan kuniga 2 marta, 3 yoshdan oshgan bolalarga 1 kapsuladan kuniga 3 marta simptomlar yo‘qolgunicha, kattalarga 1-2 kapsuladan kuniga 3 marta simptomlar yo‘qolgunicha davom ettiriladi. So‘ngra ichakning normal mikroflorasini tutib turish tartibi qo‘llanishi mumkin.

Nojo‘ya ta‘sirlari

Nojo‘ya ta‘sirlari aniqlanmagan.

Qo‘llash mumkin bo‘lmagan holatlar

Lasidofil^®-WM ning salbiy ta‘siri qayd etilmagan.

Dorilarning o‘zaro ta‘siri

Antibiotiklarni (per os) Lasidofil^®-WM bilan bir vaqtda buyurilishi uning samaradorligini pasaytiradi, shuning uchun preparatni antibiotiklarni qo‘llashdan 2 soat oldin yoki keyin qabul qilish kerak.

Maxsus ko‘rsatmalar

Quyidagi pasientlar guruhi uchun probiotik davolash faqat shifokorning kuzatuvchi ostida o‘tkaziladi:

• immun tizimi buzilgan yoki susaygan pasientlar, ayniqsa OITS ning so‘nggi bosqichlaridagi pasientlar yoki allotransplantantlari bo‘lgan, shuningdek kimyoterapiya olayotgan pasientlar;
• endo- yoki miokardit bilan kasallangan, yo‘g‘on ichakda yoki og‘iz bo‘shlig‘ida va tishlarda operasiya o‘tkazgan pasientlar;
• me‘da osti bezi faoliyatining o‘tkir buzilishi bo‘lgan pasientlar, shu jumladan insulinga qaram diabetiklar. Probiotiklar qandni o‘zlashtirish jarayonini yaxshilashi va shu yo‘l bilan pasientlarda insulin shokini chaqirish xususiyatiga ega. Probiotiklarni qabul qilganda qondagi glyukoza miqdori doimo o‘lchab turilishi, va insulinning dozasi muvofiq ravishda kamaytirilishi kerak.
• kalta ichak sindromi bo‘lgan, D-laktat asidozi bilan xastalangan bolalar. Shtammlar tomonidan D-laktatni ishlab chiqarilishini oldini olish uchun choralar ko‘rish kerak.
• qonli diareya bilan xastalangan pasientlar.

Yuqorida sanab o‘tilgan barcha holatlarda probiotiklarning ijobiy ta‘siri kuzatilishi mumkin bo‘lgan xavfdan ustundir.

Homiladorlik va emizish davrida qo‘llanishi

Preparatni qo‘llashdan oldin homilador ayollar shifokor bilan maslahatlashishlari kerak.

Preparatni bolalar ololmaydigan joyda saqlash kerak va yaroqlilik muddati tugaganidan so‘ng ishlatish mumkin emas.

Chiqarilish shakli

Ichga qabul qilish uchun qattiq jelatin kapsulalar. 10 kapsula blisterda. 2 blister qo‘llash bo‘yicha yo‘riqnomasi bilan birga karton qutida.

Saqlash sharoiti

Sovutgichda +2°S dan +8°S gacha bo‘lgan haroratda saqlansin.

Yaroqlilik muddati

3 yil.

Dorixonalardan berish tartibi

Reseptsiz beriladi.