VITARICH tabletkalari N100

Vitarich vitaminlar va mikroelementlarni saqlovchi majmuaviy preparatdir, uning farmakologik ta'siri tarkibiga kiruvchi vitaminlar va mikroelementlarning xususiyatlari bilan belgilanadi. Retinol palmitat (A vitamini) - oksidlanish-qaytarilish jarayonlarini, purin va pirimidin asoslari sintezini rag'batlantiradi, ATF sinteziga yordam beradi, teri, shilliq qavatlar, shuningdek ko'rish a'zosining normal ishlashini ta'minlaydi. Xolekaltsiferol (D3 vitamini) - oqsil (kaltsiyni bog'lovchi) sintezini rag'batlantiradi, ichak devori orqali qon va to'qimalarga kaltsiy tashilishini yaxshilaydi; suyak o'sishi zonalarida tog'ay to'qimasi rivojlanishini normallashtiradi; oqsil stromasi sintezini, qon plazmasidan kaltsiyni qamrab olishni va uning suyaklarda fosfatlar shaklida to'planishini faollashtiradi; buyraklarning proksimal naychalarida kaltsiy, natriy va fosfatlar reabsorbtsiyasini engillashtiradi. Tokoferol atsetat (E vitamini) - tabiiy antioksidant hisoblanadi va erkin radikal jarayonlarini tormozlaydi, hujayra va hujayra osti membranalarini shikastlovchi peroksidlar hosil bo'lishining oldini oladi. Tokoferol atsetat gem va gem saqlovchi fermentlar sintezini rag'batlantiradi, to'qima nafasini yaxshilaydi, xolesterin sintezini ingibitsiya qiladi; kapillyarlarning o'tkazuvchanligi va mo'rtligi oshishini, urug' naychalari, moyaklar va platsenta funktsiyasining buzilishini ogohlantiradi; reproduktiv funktsiyani normallashtiradi. Tiamin gidroxloridi (B1 vitamini) - jigarda fosforillanish natijasida karboksilazaga aylanadi, u ko'plab fermentativ reaktsiyalarning kofermenti hisoblanadi. B1 vitamini uglevodlar, oqsillar va yog'lar almashinuvini, shuningdek nerv sinapslarida qo'zg'alishni uzatish jarayonlarini tartibga solishda muhim rol o'ynaydi, anemik miokardiodistrofiyada kardiomiotsitlar metabolizmini va ularning qisqarish funktsiyasini yaxshilashga yordam beradi. Riboflavin (B2 vitamini) - hujayra nafasi va ko'rish idroki jarayonlarining muhim katalizatori hisoblanadi. ATF bilan o'zaro ta'sir qilib, flavoproteinlar kofermentlarini hosil qiladi. Oksidlanish-qaytarilish jarayonlarini tartibga soladi, to'qima nafasida, uglevodlar, oqsillar va yog'lar almashinuvida, ko'zning normal ko'rish funktsiyasini saqlashda, gemoglobin va eritropoetin sintezida ishtirok etadi. Piridoksin gidroxloridi (B6 vitamini) - organizm tomonidan to'yinmagan yog' kislotalaridan foydalanishni yaxshilaydi, asab tizimi, jigar funktsiyasi, qon yaratilishiga ijobiy ta'sir ko'rsatadi. Piridoksin oltingugurt saqlovchi aminokislota – taurin (metionin va tsiteindan) sinteziga yordam beradi, u nerv-mushak o'tkazuvchanligini, mushak qisqaruvchanligini normallashtiradi, tirishishlar rivojlanishiga to'sqinlik qiladi. Sianokobalamin (B12 vitamini) - organizmda (asosan jigarda) koferment shakliga – adenozilkobalamin yoki kobamidga aylanadi, u B12 vitaminining faol shakli hisoblanadi. Yuqori biologik faollikka ega. Kobamid dezoksiriboza va DNK, kreatin va metionin hosil bo'lishi uchun, shuningdek normal qon yaratilishi uchun zarur – eritrotsitlarning etilishiga yordam beradi. Eritrotsitlarda sulfgidril guruhlarini saqlovchi birikmalar to'planishiga yordam beradi, bu ularning gemolizga tolerantligini oshiradi. Qon ivish tizimini faollashtiradi, tromboplastik faollik va protrombin faolligining oshishini chaqiradi. Jigar va asab tizimi funktsiyasiga ijobiy ta'sir ko'rsatadi. To'qimalarning regeneratsiya qobiliyatini oshiradi. Nikotinamid - to'qima nafasi jarayonlarida, uglevodlar, yog'lar va aminokislotalar metabolizmida ishtirok etadi. Pantoten kislotasi - organizmda atsetillanish kofermenti (KoA) tarkibiga kiradi, u atsetillanish va oksidlanish jarayonlarida muhim rol o'ynaydi. Pantoten kislotasi uglevod va yog' almashinuvida hamda atsetilxolin sintezida ishtirok etadi. U buyrak usti bezi po'stlog'ida sezilarli miqdorda bo'ladi va kortikosteroidlar hosil bo'lishini rag'batlantiradi. Askorbin kislotasi - organizm hayotiy faoliyatida muhim rol o'ynaydi, kuchli ifodalangan qaytarilish (antioksidant) xususiyatlariga ega. Ko'plab biokimyoviy reaktsiyalarda vodorod transportini tartibga soladi, trikarbon kislotalar tsiklida glyukozadan foydalanishni yaxshilaydi, tetragidrofoliy kislotasi, steroid gormonlar, kollagen va pro-kollagen sintezida, to'qimalar regeneratsiyasida ishtirok etadi. Hujayralararo moddaning kolloid holatini va kapillyarlarning normal o'tkazuvchanligini (gialuronidaza faolligini susaytirish oqibatida) saqlashga yordam beradi. Xolesterin almashinuvida ishtirok etadi; jigarning detoksikatsion va oqsil sintez qilish funktsiyasini kuchaytiradi (nafas olish fermentlarini faollashtirish natijasida), jigarda glikogen to'planishiga va protrombin hosil bo'lishiga yordam beradi. O't ajralishini va oshqozon osti bezining tashqi sekretor funktsiyasini yaxshilaydi. Magniy mushak va suyak to'qimasini shakllantirishda, shuningdek oqsillar sintezida ishtirok etadi. Mis metabolizm jarayonlarida muhim rol o'ynaydi, eritrotsitlarning normal funktsiyasi va temir almashinuvi uchun zarur. Rux organizmda fiziologik va patologik jarayonlarda muhim rol o'ynaydi, metabolik va immun jarayonlarga ijobiy ta'sir ko'rsatadi, skeletning normal shakllanishi va to'qimalar regeneratsiyasi uchun zarur; insulin, kortikotropin, somatotropin va gonadotropinlar kabi hayotiy muhim gormonlar tarkibiga kiradi. Selen organizmning fermentativ antioksidant tizimining normal ishlashini ta'minlovchi asosiy mikroelementlardan biri hisoblanadi, u antitelolar hosil bo'lishini rag'batlantiradi va shu bilan shamollash va infektsion kasalliklardan himoyani oshiradi, eritrotsitlar ishlab chiqarilishida ishtirok etadi, jinsiy faollikni saqlashga va uzaytirishga yordam beradi.

Preparat qabul qilinganda siydik sariq rangga bo'yalishi mumkin, bu mutlaqo zararsiz va preparat tarkibida riboflavin mavjudligi bilan bog'liq. Tavsiya etilgan dozani oshirmang. Preparatni yaroqlilik muddati o'tgach qo'llash mumkin emas va bolalar olaolmaydigan joyda saqlash kerak.

Preparat komponentlariga yuqori sezuvchanlik, 12 yoshgacha bo'lgan bolalar.

Vitarich preparatini qabul qilish vaqtida vitaminlar va mikroelementlar saqlovchi boshqa preparatlarni qo'llash tavsiya etilmaydi.

Kattalar va 12 yoshdan katta bolalarga – 1 tabletkadan kuniga 1 marta ovqatdan keyin. Preparatni qabul qilish davomiyligini shifokor individual belgilaydi.