BARALGIN M 0,5 tabletkalari N100

Metamizol me'da-ichak traktida yaxshi va tez so'riladi. Peroral qabul qilingandan so'ng metamizol faol 4-N-metilaminoantipirin hosil bo'lishi bilan to'liq metabolizmga uchraydi. Faol metabolitning qon plazmasi oqsillari bilan bog'lanishi-50-60%.

Asosan buyraklar orqali chiqariladi. 1 g metamizol qabul qilingandan so'ng 4-N-metilaminoantipirin uchun buyrak klirensi 5 ml±2 ml/daqiqani tashkil etgan.

Yarim chiqarilish davri -2,7 soat.

Jigar sirrozi bo'lgan bemorlarda 4-N-metilaminoantipirinning yarim chiqarilish davri uch baravar oshgan va taxminan 10 soatni tashkil etgan

Allergik reaksiyalar: eshakemi, shu jumladan kon'yunktiva va burun-halqum shilliq qavatlarida, Kvinke shishi, kamdan-kam hollarda xavfli ekssudativ eritema (Stivens-Djonson sindromi), toksik epidermal nekroliz (Layell sindromi), bronxospastik sindrom, anafilaktik shok.

Qon yaratish a'zolari tomonidan: leykopeniya, kam hollarda immun genezli agranulotsitoz va trombotsitopeniya. Siydik chiqarish tizimi tomonidan: buyrak funktsiyasining buzilishi, oliguriya, anuriya, proteinuriya, juda kam hollarda o'tkir interstitsial nefrit rivojlanishi, siydikning qizil rangga bo'yalishi (rubazon kislotasi metaboliti ajralishi hisobiga).

Boshqalar: qon bosimining pasayishi, yurak ritmining buzilishi mumkin.

Sitostatik vositalarni olayotgan bemorlarni davolashda metamizol natriyni qabul qilish faqat shifokor nazorati ostida amalga oshirilishi kerak.

Homiladorlik vaqtida, ayniqsa dastlabki 3 oyda va oxirgi 3 oyda hech qanday nosteroid yallig'lanishga qarshi vositalarni qo'llash mumkin emas.

Atopik bronxial astma va pollinozlari bo'lgan bemorlarda yuqori sezuvchanlik reaksiyalari rivojlanishi xavfi yuqori. Uzoq muddat qo'llanilganda periferik qon manzarasini nazorat qilish zarur. Metamizol natriy qabul qilish fonida agranulotsitoz rivojlanishi mumkin, shu munosabat bilan haroratning asossiz ko'tarilishi, qaltirash, tomoqda og'riq, yutinish qiyinlashishi, stomatit, og'iz bo'shlig'ining eroziv-yarali shikastlanishlari, vaginit yoki proktit aniqlanganda preparatni zudlik bilan bekor qilish zarur. Preparatni qorindagi o'tkir og'riqlarni qoldirish uchun ishlatish mumkin emas (sababi aniqlangungacha).

Sistolik qon bosimi 100 mm sim. ust. dan past bo'lgan bemorlarga yoki qon aylanishi beqarorligida (masalan, miokard infarktida boshlanayotgan og'ir qon aylanishi buzilishi, ko'p sonli jarohat, boshlanayotgan shok holatida), anamnestik ko'rsatmalarda buyrak kasalliklari (pielonefrit, glomerulonefrit) bo'lgan va uzoq muddatli alkogolli anamnezda alohida ehtiyotkorlik talab etiladi.

Homiladorlik va emizish

Homiladorlikning dastlabki va oxirgi uch oyligi davomida Baralgin M ni qabul qilish mumkin emas. Homiladorlikning to'rtinchidan oltinchi oylarigacha Baralgin M ni qabul qilish qat'iy tibbiy ko'rsatmalar bo'yicha amalga oshirilishi kerak.

Baralgin M qabul qilingandan so'ng emizish 48 soatga to'xtatilishi kerak.

Baralgin M ni pirazolonlarga (izopropilaminofenazol, propifenazon, fenazon yoki fenilbutazon) yuqori sezuvchanligi bo'lgan shaxslarga, jigar porfiriyasi, tug'ma glyukoza-6-fosfatdegidrogenaza tanqisligi, homiladorlikning birinchi uch oyi va oxirgi uch oyida, bronxial astma va bronxospazm bilan kechuvchi kasalliklarda, -aspirin astmasi-, jigar va buyrak faoliyatining yaqqol buzilishlarida, qon yaratishning yaqqol buzilishlarida (agranulotsitoz, tsitoplastik va infektsion neytropeniya) qabul qilish mumkin emas.

Baralgin M tabletkalarini 15 yoshdan kichik bolalar qabul qilmasliklari kerak

Alkogol va metamizol bir vaqtda qabul qilinganda ularning samaralariga o'zaro ta'sir qiladi, siklosporin bilan birga qo'llanilganda qonda siklosporin konsentratsiyasi pasayishi mumkin. Metamizolni boshqa nonarkotik analgetiklar bilan bir vaqtda qo'llash toksik samaralarning o'zaro kuchayishiga olib kelishi mumkin.

Tritsiklik antidepressantlar, oral kontratseptivlar, allopurinol jigarda metamizol metabolizmini buzadi va uning toksikligini oshiradi. Barbituratlar, fenilbutazon va jigar mikrosomal fermentlarining boshqa induktorlari metamizol ta'sirini susaytiradi.

Sedativ vositalar va trankvilizatorlar preparatning og'riqsizlantiruvchi ta'sirini kuchaytiradi. Xlorpromazin yoki boshqa fenotiazin hosilalari bilan bir vaqtda qo'llash yaqqol gipertermiya rivojlanishiga olib kelishi mumkin.

Rentgenokontrast moddalar, kolloid qon o'rnini bosuvchilar va penitsillin metamizol bilan davolash vaqtida qo'llanilmasligi kerak.