AZITROMISIN VOKXARD LIMITED kapsulalar 250mg N6

So'rilishi - yuqori, kislotaga chidamli, lipofil. Bir marta 0,5 g qabul qilingandan so'ng biologik kira olishligi - 37% (jigardan "birinchi o'tish" effekti), peroral 0,5 g qabul qilingandan so'ng maksimal kontsentratsiya - 0,4 mg/l, maksimal kontsentratsiyaga erishish vaqti - 2,5-2,9 soat; to'qimalar va hujayralardagi kontsentratsiya qon plazmasidagiga qaraganda 10-50 baravar yuqori, taqsimlanish hajmi - 31,1 l/kg. Gistogematik to'siqlar orqali oson o'tadi. Nafas yo'llariga, siydik-tanosil a'zolari va to'qimalariga, shu jumladan prostata beziga, teri va yumshoq to'qimalarga yaxshi kirib boradi.

Hujayra membranalari orqali o'tadi va ularda yuqori kontsentratsiyalarni hosil qiladi, lizosomalarda to'planadi (bu hujayra ichida joylashgan qo'zg'atuvchilarni eradikatsiya qilish uchun ayniqsa muhimdir). Shuningdek fagotsitlar: polimorf yadroli leykotsitlar va makrofaglar tomonidan tashiladi.

Infektsiya o'choqlaridagi kontsentratsiya sog'lom to'qimalarga qaraganda ishonchli darajada yuqori (24-34% ga) va yallig'lanish shishi darajasi bilan korrelyatsiya qiladi. Oxirgi doza qabul qilingandan keyin 5-7 kun davomida samarali kontsentratsiyalarda saqlanib turadi. Plazma oqsillari bilan bog'lanishi - 7-50% (qondagi kontsentratsiyaga teskari proportsional).

Jigarda demetillanadi, faol bo'lmagan metabolitlar hosil bo'ladi. Preparat metabolizmida CYP3A4, CYP3A5, CYP3A7 izofermentlari ishtirok etadi, u ularning ingibitori hisoblanadi. Plazma klirensi - 630 ml/daq. Qabul qilingandan keyin 8 va 24 soat oralig'idagi yarim chiqarilish davri - 14-20 soat, 24 dan 72 soatgacha bo'lgan oraliqdagi yarim chiqarilish davri - 41 soat. 50% safro bilan o'zgarmagan holda, 6% - buyraklar orqali chiqariladi.

Ovqat qabul qilish farmakokinetikani sezilarli darajada o'zgartiradi: maksimal kontsentratsiya va «kontsentratsiya - vaqt» egri chizig'i ostidagi maydon (AUC) mos ravishda 52% va 43% ga kamayadi.

Keksa erkaklarda (65-85 yosh) farmakokinetik parametrlar o'zgarmaydi, ayollarda maksimal kontsentratsiya ortadi (30-50% ga).

Nojo'ya ta'sirlarning uchrash tezligi Jahon sog'liqni saqlash tashkiloti tavsiyalariga muvofiq tasniflangan: juda tez-tez - kamida 10%; tez-tez - kamida 1%, lekin 10% dan kam; tez-tez emas - kamida 0,1%, lekin 1% dan kam; kam hollarda - kamida 0,01%, lekin 0,1% dan kam; juda kam hollarda - 0,01% dan kam; uchrash tezligi noma'lum - mavjud ma'lumotlar asosida baholab bo'lmaydi.

Infeksion kasalliklar: tez-tez emas - kandidoz, shu jumladan og'iz bo'shlig'i shilliq qavati va genitliylar, pnevmoniya, faringit, gastroenterit, respirator kasalliklar, rinit; uchrash tezligi noma'lum - soxtamembranoz kolit.

Qon va limfa tizimi tomonidan: tez-tez emas - leykopeniya, neytropeniya, eozinofiliya; juda kam hollarda - trombotsitopeniya, gemolitik anemiya.

Moddalar almashinuvi va oziqlanish tomonidan: tez-tez emas - anoreksiya.

Allergik reaksiyalar: tez-tez emas - angionevrotik shish, o'ta yuqori sezuvchanlik reaksiyasi; uchrash tezligi noma'lum - anafilaktik reaksiya.

Asab tizimi tomonidan: tez-tez - bosh og'rig'i; tez-tez emas - bosh aylanishi, ta'm bilishning buzilishi, paresteziyalar, uyquchanlik, uyqusizlik, asabiylik; kam hollarda - ajitatsiya; uchrash tezligi noma'lum - gipesteziya, xavotir, tajovuzkorlik, hushdan ketish, tirishishlar, psixomotor giperfaollik, hid bilishning yo'qolishi, hid bilishning buzilishi, ta'm bilishning yo'qolishi, miasteniya, alahsirash, gallyutsinatsiyalar.

Ko'rish a'zosi tomonidan: tez-tez emas - ko'rishning buzilishi.

Eshitish a'zosi va labirint buzilishlari: tez-tez emas - eshitishning buzilishi, vertigo; uchrash tezligi noma'lum - eshitishning buzilishi, shu jumladan karlik va/yoki quloqlarda shovqin. Yurak-qon tomir tizimi tomonidan: tez-tez emas - yurak urishini his qilish, yuzga qon «oqib kelishi»; uchrash tezligi noma'lum - qon bosimining pasayishi, elektrokardiogrammada QT oralig'ining uzayishi, «piruet» tipidagi aritmiya, qorinchalar taxikardiyasi.

Nafas olish tizimi tomonidan: tez-tez emas - hansirash, burun qonashi.

Oshqozon-ichak trakti tomonidan: juda tez-tez - diareya; tez-tez - ko'ngil aynishi, qusish, qorinda og'riq; tez-tez emas - meteorizm, dispepsiya, qabziyat, gastrit, disfagiya, qorin dam bo'lishi, og'iz bo'shlig'i shilliq qavatining qurishi, kekirish, og'iz bo'shlig'i shilliq qavati yaralari, so'lak bezlari sekretsiyasining oshishi; juda kam hollarda - til rangining o'zgarishi, pankreatit.

Jigar va o't yo'llari tomonidan: tez-tez emas - gepatit; kam hollarda - jigar funktsiyasining buzilishi, xolestatik sariqlik; uchrash tezligi noma'lum - jigar yetishmovchiligi (kam hollarda o'lim bilan yakunlanishi mumkin, asosan jigar funktsiyasining og'ir darajali buzilishi fonida); jigar nekrozi, fulminant gepatit.

Teri va teri osti to'qimalari tomonidan: tez-tez emas - teri toshmasi qichishish, eshakemi, dermatit, teri qurishi, terlash; kam hollarda - fotosensibilizatsiya reaksiyasi; uchrash tezligi noma'lum - Stivens-Djonson sindromi, toksik epidermal nekroliz, ko'p shaklli eritema.

Tayanch-harakat tizimi tomonidan: tez-tez emas - osteoartrit, mialgiya, belda og'riq, bo'yinda og'riq; uchrash tezligi noma'lum - artralgiya.

Siydik chiqarish tizimi va buyraklar tomonidan: tez-tez emas - dizuriya, buyrak sohasida og'riq; uchrash tezligi noma'lum - interstitsial nefrit, o'tkir buyrak yetishmovchiligi.

Jinsiy a'zolar va sut bezi tomonidan: tez-tez emas - metrorragiyalar, moyaklar funktsiyasining buzilishi.

Boshqalar: tez-tez emas - asteniya, holsizlik, charchoq hissi, yuz shishi, ko'krakda og'riq, isitma, periferik shishlar.

Laboratoriya ma'lumotlari: tez-tez - limfotsitlar sonining kamayishi, eozinofillar sonining oshishi, bazofillar sonining oshishi, monotsitlar sonining oshishi, neytrofillar sonining oshishi, qon plazmasida bikarbonatlar kontsentratsiyasining pasayishi, tez-tez emas - aspartataminotransferaza, alaninaminotransferaza faolligining oshishi, qon plazmasida bilirubin kontsentratsiyasining oshishi, qon plazmasida mochevina kontsentratsiyasining oshishi, qon plazmasida kreatinin kontsentratsiyasining oshishi, qon plazmasida kaliy miqdorining o'zgarishi, qon plazmasida ishqoriy fosfataza faolligining oshishi, qon plazmasida xlor miqdorining oshishi, qonda glyukoza kontsentratsiyasining oshishi, trombotsitlar sonining oshishi, gematokritning oshishi, qon plazmasida bikarbonatlar kontsentratsiyasining oshishi, qon plazmasida natriy miqdorining o'zgarishi.

Azitromitsin preparatining bitta dozasini qabul qilish o'tkazib yuborilgan taqdirda - o'tkazib yuborilgan dozani imkon qadar tezroq, keyingilarini esa - 24 soatlik tanaffuslar bilan qabul qilish kerak.

Azitromitsin preparatini antatsid preparatlarni qabul qilishdan kamida bir soat oldin yoki ikki soat keyin qabul qilish kerak.

Fulminant gepatit va og'ir darajadagi jigar yetishmovchiligi rivojlanishi mumkinligi sababli, yengil va o'rta darajadagi jigar funksiyasi buzilgan bemorlarga Azitromitsin preparatini ehtiyotkorlik bilan qo'llash kerak. Jigar funksiyasi buzilishi belgilari, masalan, tez kuchayib boruvchi asteniya, sariqlik, siydik rangi to'qlashishi, qon ketishga moyillik, jigar ensefalopatiyasi mavjud bo'lganda, Azitromitsin preparati bilan davolashni to'xtatish va jigar funksional holatini tekshirish kerak.

Buyrak funksiyasi buzilishlarida: KBF 10-80 ml/daq bo'lgan bemorlarda dozaga tuzatish kiritish talab etilmaydi, Azitromitsin preparati bilan davolashni buyrak funksiyasi holatini nazorat qilgan holda ehtiyotkorlik bilan o'tkazish kerak.

Boshqa antibakterial preparatlar qo'llanilganda bo'lgani kabi, Azitromitsin preparati bilan davolashda bemorlarni ta'sirchan bo'lmagan mikroorganizmlar mavjudligiga va superinfeksiyalar, shu jumladan zamburug'li infeksiyalar rivojlanishi belgilariga muntazam tekshirib turish kerak.

Azitromitsin preparatini yo'riqnomada ko'rsatilganidan ko'ra uzoqroq kurslar bilan qo'llash mumkin emas, chunki azitromitsinning farmakokinetik xususiyatlari qisqa va oddiy dozalash tartibini tavsiya etishga imkon beradi.

Azitromitsin va ergotamin hamda digidroergotamin hosilalari o'rtasida o'zaro ta'sir ehtimoli haqida ma'lumotlar yo'q, ammo makrolidlar ergotamin va digidroergotamin hosilalari bilan bir vaqtda qo'llanilganda ergotizm rivojlanishi sababli ushbu kombinatsiya tavsiya etilmaydi.

Azitromitsin preparati uzoq muddat qabul qilinganda Clostridium difficile chaqirgan soxta membranoz kolit rivojlanishi mumkin, u yengil diareya ko'rinishida ham, og'ir kolit ko'rinishida ham bo'lishi mumkin. Azitromitsin preparati qabul qilish fonida antibiotik-assotsiatsiyalangan diareya rivojlanganda, shuningdek davolash tugaganidan keyin 2 oy davomida klostridial soxta membranoz kolitni istisno qilish kerak. Ichak peristaltikasini tormozlovchi preparatlarni qabul qilish mumkin emas.

Makrolidlar, shu jumladan azitromitsin bilan davolashda, yurak repolyarizatsiyasi va QT intervalining uzayishi kuzatilgan, bu yurak aritmiyalari, shu jumladan "piruet" turidagi aritmiya rivojlanishi xavfini oshiradi.

Proaritmogen omillar mavjud bo'lgan bemorlarda (ayniqsa keksa bemorlarda): tug'ma yoki orttirilgan QT intervali uzayishi bo'lgan, IA (xinidin, prokainamid), III (dofetilid, amiodaron va sotalol) sinf antiaritmik preparatlar, sizaprid, terfenadin, antipsixotik preparatlar (pimozid), antidepressantlar (sitalopram), ftorxinolonlar (moksifloksatsin va levofloksatsin) bilan davolash olayotgan, suv-elektrolit balansi buzilishlari, ayniqsa gipokaliemiya yoki gipomagniemiya bo'lgan, klinik ahamiyatli bradikardiya, yurak aritmiyasi yoki og'ir yurak yetishmovchiligi bo'lgan bemorlarda Azitromitsin preparatini qo'llashda ehtiyotkorlikka rioya qilish kerak.

Azitromitsin preparatini qo'llash miastenik sindrom rivojlanishini qo'zg'atishi yoki miasteniya zo'rayishini chaqirishi mumkin.

Transport vositalarini, mexanizmlarni boshqarish qobiliyatiga ta'siri

Asab tizimi va ko'rish a'zolari tomonidan nojo'ya ta'sirlar rivojlanganda, yuqori diqqatni jamlash va psixomotor reaksiyalar tezligini talab qiluvchi harakatlarni bajarishda ehtiyotkorlikka rioya qilish kerak.

Azitromitsinga, eritromitsinga, boshqa makrolidlarga yoki ketolidlarga yoki preparatning boshqa komponentlariga yuqori sezuvchanlik; og'ir jigar yetishmovchiligi (Chayld-Pyu bo'yicha S sinfi); tana vazni 45 kg dan kam bo'lgan 12 yoshgacha bo'lgan bolalar; ergotamin va digidroergotamin bilan bir vaqtda qabul qilish.

Ehtiyotkorlik bilan

Jigar faoliyatining yengil va o'rtacha og'irlikdagi buzilishlari, KFT (kalavalar filtratsiyasi tezligi) 10 ml/daq dan kam bo'lgan terminal buyrak yetishmovchiligi, proaritmogen omillari mavjud bo'lgan bemorlar (ayniqsa keksa bemorlar): tug'ma yoki orttirilgan QT oralig'ining uzayishi bilan, IA (xinidin, prokainamid), III (dofetilid, amiodaron va sotalol) sinf antiaritmik vositalari, tsisaprid, terfenadin, antipsixotik preparatlar (pimozid), antidepressantlar (tsitalopram), ftorxinolonlar (moksifloksatsin va levofloksatsin) bilan terapiya olayotgan bemorlar, suv-elektrolit muvozanati buzilishlari bilan, ayniqsa gipokaliemiya yoki gipomagniemiya holatida, klinik ahamiyatli bradikardiya, yurak aritmiyasi yoki og'ir yurak yetishmovchiligi bilan; digoksin, varfarin, tsiklosporinni bir vaqtda qo'llash, miasteniya.

Homiladorlik va emizish davrida qo'llanilishi

Homiladorlikda va emizish davrida faqat ona uchun taxmin qilinadigan foyda homila va bola uchun potentsial xavfdan ustun bo'lgan holdagina qo'llaniladi. Emizish davrida preparatni qo'llash zarurati tug'ilganda emizishni to'xtatib turish tavsiya etiladi.

Antatsid preparatlar

Antatsid preparatlar azitromitsin biokiraolishligiga ta'sir qilmaydi, ammo qondagi maksimal konsentratsiyani 30% ga kamaytiradi, shuning uchun preparatni ushbu preparatlar va ovqat qabul qilinishidan kamida bir soat oldin yoki ikki soat keyin qabul qilish kerak. Setirizin

Sog'lom ko'ngillilarda azitromitsinni setirizin (20 mg) bilan 5 kun davomida bir vaqtda qo'llash farmakokinetik o'zaro ta'sirga va QT oralig'ining sezilarli o'zgarishiga olib kelmagan.

Didanozin (dideoksiinozin)

6 nafar OIV-infektsiyalangan bemorlarda azitromitsin (1200 mg/sut) va didanozinni (400 mg/sut) bir vaqtda qo'llash platsebo guruhiga nisbatan didanozinning farmakokinetik ko'rsatkichlari o'zgarishini aniqlamadi.

Digoksin (P-glikoprotein substratlari)

Makrolid antibiotiklarni, shu jumladan azitromitsinni P-glikoprotein substratlari, masalan digoksin bilan bir vaqtda qo'llash qon zardobida P-glikoprotein substrati konsentratsiyasining oshishiga olib keladi. Shunday qilib, azitromitsin va digoksin bir vaqtda qo'llanilganda qon zardobida digoksin konsentratsiyasi oshishi mumkinligini hisobga olish kerak.

Zidovudin

Azitromitsinni bir vaqtda qo'llash (1000 mg bir marta qabul qilish va 1200 mg yoki 600 mg ko'p marta qabul qilish) zidovudin yoki uning glyukuronid metabolitining farmakokinetikasiga, shu jumladan buyraklar orqali chiqarilishiga ahamiyatsiz ta'sir ko'rsatadi. Biroq azitromitsinni qo'llash periferik qon mononuklearlarida fosforillangan zidovudin, klinik faol metabolit konsentratsiyasining oshishini keltirib chiqargan. Ushbu faktning klinik ahamiyati noaniq.

Azitromitsin sitoxrom P450 tizimi izofermentlari bilan kuchsiz o'zaro ta'sir qiladi. Azitromitsin eritromitsin va boshqa makrolidlarga o'xshash farmakokinetik o'zaro ta'sirlarda ishtirok etishi aniqlanmagan. Azitromitsin sitoxrom P450 izofermentlari ingibitori va induktori hisoblanmaydi.

Sporinya alkaloidlari

Ergotizm yuzaga kelishining nazariy ehtimolini hisobga olib, azitromitsinni sporinya alkaloidlari hosilalari bilan bir vaqtda qo'llash tavsiya etilmaydi.

Azitromitsin va metabolizmi sitoxrom P450 tizimi izofermentlari ishtirokida sodir bo'ladigan preparatlarni bir vaqtda qo'llash bo'yicha farmakokinetik tadqiqotlar o'tkazilgan.

Atorvastatin

Atorvastatin (har kuni 10 mg) va azitromitsinni (har kuni 500 mg) bir vaqtda qo'llash qon plazmasida atorvastatin konsentratsiyalari o'zgarishini keltirib chiqarmagan (GMK-KoA-reduktaza ingibitsiya qilinishi tahlili asosida). Biroq, ro'yxatdan o'tkazilgandan keyingi davrda azitromitsin va statinlarni bir vaqtda olgan bemorlarda rabdomioliz holatlari haqida alohida xabarlar olingan.

Karbamazepin

13 ta farmakokinetik tadqiqotda sog'lom ko'ngillilar ishtirokida bir vaqtning o'zida azitromitsin olgan bemorlarda karbamazepin va uning faol metaboliti konsentratsiyasiga sezilarli ta'sir aniqlanmagan.

Simetidin

13 ta farmakokinetik tadqiqotda simetidinning bir martalik dozasining azitromitsin farmakokinetikasiga ta'siri, simetidin azitromitsindan 2 soat oldin qo'llanilishi sharti bilan, azitromitsin farmakokinetikasi o'zgarishini aniqlamadi.

Bilvosita antikoagulyantlar (kumarin hosilalari)

L3 farmakokinetik tadqiqotlarda azitromitsin sog'lom ko'ngillilar tomonidan qabul qilingan varfarinning 15 mg bir martalik dozasining antikoagulyant samarasiga ta'sir qilmagan. Azitromitsin va bilvosita antikoagulyantlar (kumarin hosilalari) bir vaqtda qo'llanilgandan keyin antikoagulyant samara potentsiyalanishi haqida xabar berilgan. Sababiy bog'liqlik aniqlanmaganligiga qaramay, peroral bilvosita antikoagulyantlar (kumarin hosilalari) olayotgan bemorlarda azitromitsin qo'llanilganda protrombin vaqtini tez-tez monitoring qilish zaruratini hisobga olish kerak.

Siklosporin

Uch kun davomida ichga azitromitsin (bir marta 500 mg/sut), so'ngra siklosporin (bir marta 10 mg/kg/sut) qabul qilgan sog'lom ko'ngillilar ishtirokidagi farmakokinetik tadqiqotda siklosporinning qon plazmasidagi maksimal konsentratsiyasi (Cmax) va «konsentratsiya-vaqt» egri chizig'i ostidagi maydonning (AUC0-5) ishonchli oshishi aniqlangan. Ushbu preparatlarni bir vaqtda qo'llashda ehtiyot bo'lish kerak. Ushbu preparatlarni bir vaqtda qo'llash zarurati bo'lganda, qon plazmasida siklosporin konsentratsiyasini monitoring qilish va dozani tegishli ravishda to'g'irlash kerak.

Efavirenz

Azitromitsin (bir marta 600 mg/sut) va efavirenzni (400 mg/sut) har kuni 7 kun davomida bir vaqtda qo'llash hech qanday klinik ahamiyatli farmakokinetik o'zaro ta'sirni keltirib chiqarmagan.

Flukonazol

Azitromitsinni (bir marta 1200 mg) bir vaqtda qo'llash flukonazol (bir marta 800 mg) farmakokinetikasini o'zgartirmagan. Azitromitsinning umumiy ekspozitsiyasi va yarim chiqarilish davri flukonazol bir vaqtda qo'llanilganda o'zgarmagan, biroq bunda azitromitsin Cmax pasayishi (18% ga) kuzatilgan, bu klinik ahamiyatga ega bo'lmagan.

Indinavir

Azitromitsinni (bir marta 1200 mg) bir vaqtda qo'llash indinavir farmakokinetikasiga (5 kun davomida sutkasiga uch marta 800 mg) statistik ishonchli ta'sir ko'rsatmagan.

Metilprednizolon

Azitromitsin metilprednizolon farmakokinetikasiga sezilarli ta'sir ko'rsatmaydi.

Nelfinavir

Azitromitsin (1200 mg) va nelfinavirni (750 mg dan kunda 3 marta) bir vaqtda qo'llash qon zardobida azitromitsinning muvozanatli konsentratsiyalari oshishini chaqiradi. Klinik ahamiyatli nojo'ya samaralar kuzatilmagan va nelfinavir bilan bir vaqtda qo'llanilganda azitromitsin dozasini to'g'irlash talab etilmaydi.

Rifabutin

Azitromitsin va rifabutinni bir vaqtda qo'llash preparatlarning har birining qon zardobidagi konsentratsiyasiga ta'sir qilmaydi. Azitromitsin va rifabutin bir vaqtda qo'llanilganda ba'zan neytropeniya kuzatilgan. Neytropeniya rifabutin qo'llanilishi bilan bog'liq bo'lishiga qaramay, azitromitsin va rifabutin kombinatsiyasini qo'llash va neytropeniya o'rtasidagi sabab-oqibat bog'liqligi aniqlanmagan.

Sildenafil

Sog'lom ko'ngillilarda qo'llanilganda azitromitsinning (3 kun davomida har kuni 500 mg/sut) sildenafil yoki uning asosiy aylanib yuruvchi metabolitining AUC va Cmax ga ta'siri isbotlanmagan.

Terfenadin

13 ta farmakokinetik tadqiqotda azitromitsin va terfenadin o'rtasidagi o'zaro ta'sir isbotlanmagan. Bunday o'zaro ta'sir imkoniyatini butunlay istisno qilib bo'lmaydigan yagona holatlar haqida xabar berilgan, biroq bunday o'zaro ta'sir sodir bo'lganligi haqida hech qanday aniq dalil bo'lmagan.

Terfenadin va makrolidlarni bir vaqtda qo'llash aritmiya va QT oralig'i uzayishini chaqirishi mumkinligi aniqlangan.

Teofillin

Azitromitsin va teofillin o'rtasida o'zaro ta'sir aniqlanmagan.

Triazolam /midazolam

'Azitromitsin triazolam yoki midazolam bilan terapevtik dozalarda bir vaqtda qo'llanilganda farmakokinetik ko'rsatkichlarning sezilarli o'zgarishlari aniqlanmagan.

Trimetoprim / sulfametoksazol

Trimetoprim / sulfametoksazol azitromitsin bilan bir vaqtda qo'llanilganda Cmax, umumiy ekspozitsiya yoki trimetoprim yoki sulfametoksazolning buyraklar orqali ekskretsiyasiga sezilarli ta'sir aniqlanmagan. Qon zardobidagi azitromitsin konsentratsiyalari boshqa tadqiqotlarda aniqlanganlarga mos kelgan.