EMKOR tabletkalari 10mg N30

Ichga qabul qilingandan so'ng bisoprolol MITYdan yaxshi so'riladi. Biokiraolishligi taxminan 90% ni tashkil qiladi va ovqatlanishga bog'liq emas. Сmax ga 1-3 soatdan keyin erishiladi. Qon plazmasi oqsillari bilan bog'lanishi taxminan 30% ni tashkil qiladi. Jigar orqali «birinchi o'tish» effekti kam ifodalangan. Т1/2 10-12 soatni tashkil qiladi.

Ichki simpatomimetik faollikka va membranani barqarorlashtiruvchi xususiyatlarga ega bo‘lmagan selektiv beta1-adrenoblokator. Yurak qisqarishlari chastotasi va kuchini (tinch holatda va yuklamada) va yurakdan otilib chiquvchi qon hajmini kamaytiradi, bunda zarb hajmi sezilarli darajada kamaymaydi. AV o‘tkazuvchanlikni susaytiradi, buyraklar tomonidan renin sekretsiyasini pasaytiradi, miokardning kislorodga bo‘lgan ehtiyojini kamaytiradi. Antiaritmik, gipotenziv va antianginal ta’sir ko‘rsatadi.

Davolash kursining boshida vaqtinchalik markaziy asab tizimining buzilishlari paydo bo'lishi mumkin: holsizlik, charchoq, bosh aylanishi, bosh og'rig'i, uyqu buzilishi, ruhiy buzilishlar. Yurak-qon tomir tizimi tomonidan: ortostatik gipotenziya, bradikardiya, AV o'tkazuvchanlikning buzilishi, oyoq-qo'llarda sovush va paresteziya hissi, vaqti-vaqti bilan oqsoqlanishning va Reyno sindromidagi asosiy klinik simptomlarning kuchayishi; Tayanch-harakat tizimi tomonidan: alohida hollarda mushak holsizligi, mushak talvasalari; Ko'rish organlari tomonidan: ko'z yosh suyuqligi ajralishining kamayishi, kon'yunktivit; Oshqozon-ichak trakti tomonidan: alohida hollarda diareya, qabziyat, ko'ngil aynishi, qorinda og'riq; Alohida hollarda: teri qichishishi va qizarishi, terlash, qandli diabeti bo'lgan bemorlarda glyukozaga tolerantlikning pasayishi, allergik reaksiyalar; psoriaz ko'rinishlarining kuchayishi, psoriazsimon toshmalar paydo bo'lishi. Moyilligi bo'lgan bemorlarda bronxial obstruksiya simptomlari paydo bo'lishi mumkin.

Yo'ldosh psoriazda, oilaviy anamnezda psoriaz ko'rsatilgan bo'lsa, dekompensatsiya bosqichidagi qandli diabetda, allergik reaksiyalarga moyil bemorlarda ehtiyotkorlik bilan qo'llaniladi. Feoxromotsitomada bisoprololni qo'llash faqat alfa-adrenoblokatorlar qabul qilingandan keyin mumkin. Jarrohlik aralashuvidan oldin anesteziologni bisoprolol bilan davolash haqida xabardor qilish kerak. Davolash davrida alkogol iste'mol qilishga yo'l qo'ymaslik kerak. Faoliyati diqqatni jamlash va psixomotor reaksiyalar yuqori tezligi zarurati bilan bog'liq bo'lgan bemorlarda ehtiyotkorlik bilan qo'llaniladi. Homiladorlik va laktatsiya. Homiladorlikda, laktatsiya davrida, shuningdek bolalarda qo'llash tavsiya etilmaydi. Homiladorlikda qo'llashning alohida hollarida yangi tug'ilgan chaqaloqda bradikardiya, arterial gipotenziya, gipoglikemiya va nafas siqilishi ehtimoli tufayli bisoprololni kutilayotgan tug'ruq muddatidan 72 soat oldin bekor qilish kerak. Agar bekor qilishning iloji bo'lmasa, unda tug'ruqdan keyin 72 soat davomida yangi tug'ilgan chaqaloqning holatini sinchkovlik bilan nazorat qilish zarur. Preparatni yaroqlilik muddati o'tgandan keyin qo'llamaslik kerak va bolalar ololmaydigan joyda saqlash kerak.

Kardiogen shok, II va III darajali AV blokada, sinus tuguni zaifligi sindromi, sinoatrial blokada, bradikardiya (puls daqiqasiga 50 urishdan kam), arterial gipotenziya (SAB 90 mm sim.ust. dan past); bronxospazmga moyillik (bronxial astma va bronxoobstruktiv sindromli boshqa kasalliklar), periferik qon aylanishining yaqqol buzilishlari; MAO ingibitorlarini (MAO-B ingibitorlari bundan mustasno) bir vaqtda qabul qilish, bisoprololga va boshqa beta-adrenoblokatorlarga yuqori sezuvchanlik. Surunkali yurak yetishmovchiligi bo'lgan bemorlarda preparatni yurak yetishmovchiligi zo'rayishida yoki inotrop preparatlarni tomir ichiga yuborishni talab qiluvchi yurak yetishmovchiligi dekompensatsiyasi epizodlari vaqtida; shuningdek bradikardiya (puls daqiqasiga 60 urishdan kam) va gipotenziyada (SAB 100 mm sim.ust. dan past), homiladorlik va laktatsiya davri, bolalar yoshida qabul qilmaslik kerak.

Bisoprolol boshqa gipotenziv vositalarning, shuningdek gipotenziv ta’sir ko‘rsatishi mumkin bo‘lgan preparatlarning ta’sirini kuchaytirishi mumkin. Rezerpin, alfa-metildopa, klonidin, angishvonagul yoki guanfatsin bilan bir vaqtda qo‘llanilganda yaqqol bradikardiya bo‘lishi mumkin. Bisoprololni qabul qilish fonida v/i kalsiy kanallari blokatorlari va antiaritmik vositalarni tayinlamaslik kerak. Ergotamin hosilalarini bir vaqtda qabul qilish periferik qon aylanishi buzilishlarini kuchaytirishi mumkin. Insulin yoki boshqa gipoglikemizatsiyalovchi vositalar bilan bir vaqtda qo‘llanilganda ularning ta’siri kuchayishi mumkin.

Dozalash individual ravishda, davolash samaradorligi va puls chastotasini hisobga olgan holda tanlanadi. Arterial gipertenziya va yurak ishemik kasalligi bo'lgan bemorlarga sutkalik doza 2,5-10 mg, sutkasiga 1 marta buyuriladi. Boshlang'ich doza sutkasiga 1 marta 2,5 mg ni, maksimal sutkalik doza - 10 mg ni tashkil qiladi. Doza titrlash usuli bilan asta-sekin oshiriladi. Jigar yoki buyrak funksiyasining yengil yoki o'rtacha shakldagi buzilishlari bo'lgan bemorlarda, shuningdek keksa bemorlarda odatda dozani tanlash talab etilmaydi. Surunkali yurak yetishmovchiligini davolashda (so'nggi 6 hafta ichida zo'rayishsiz barqaror holatda) quyidagi dozalash rejimi tavsiya etiladi: boshlang'ich doza birinchi hafta davomida sutkasiga 1,25 mg bir martani tashkil qiladi, qabul qilishning ikkinchi haftasida sutkasiga 2,5 mg, uchinchi haftada – sutkasiga 3,75 mg, to'rtinchidan sakkizinchi haftagacha – 5 mg buyuriladi, keyin doza 7,5 mg gacha oshiriladi, davolashning o'n ikkinchi haftasidan so'ng maksimal dozalash – 10 mg buyuriladi. Shifokor dozalash rejimini individual o'zlashtirilishiga qarab to'g'irlashi mumkin. Emkorni ertalab och qoringa yoki nonushta vaqtida, oz miqdordagi suyuqlik bilan qabul qilish tavsiya etiladi. Emkor preparati bilan davolashni to'satdan to'xtatish mumkin emas, davolash kursi, qoida tariqasida, dozani asta-sekin kamaytirish bilan sekin tugatilishi kerak. Barcha hollarda preparat bilan davolash davomiyligini shifokor belgilaydi.