MAGNIYA SULFAT eritma 5ml 25% N10

Parenteral yuborilganda sedativ, uxlatuvchi, umumiy og'riqsizlantiruvchi, tutqanoqqa qarshi, antiaritmik, gipotenziv, spazmolitik va tokolitik ta'sir ko'rsatadi. Ta'sir mexanizmi. Kaltsiyning fiziologik antagonisti bo'lib, uni bog'lanish joylaridan siqib chiqaradi. Almashinuv jarayonlarini, neyromediator jarayonlarni va nerv-mushak o'tkazuvchanligini tartibga soluvchi 300 dan ortiq fermentativ reaktsiyalarda ishtirok etadi. Magniy ionlari hujayra membranasining potentsialga bog'liq kaltsiy kanallari blokatorlari rolini o'ynaydi. Natijada presinaptik membrana orqali kaltsiy ionlarining kirishi buziladi, bu atsetilxolin ajralishining kamayishiga va nerv-mushak o'tkazuvchanligining susayishiga olib keladi. Bosh miya po'stlog'ida neyromediatorlarning kaltsiy-vositachiligidagi ajralishini dozaga bog'liq holda susaytiradi, plazmada kontsentratsiya oshishi bilan avval sedativ, so'ngra uxlatuvchi va tutqanoqqa qarshi va nihoyat - umumiy og'riqsizlantiruvchi samara (narkoz) chaqiradi. Magniy sulfat ichki organlar, bachadon va tomirlar silliq mushaklarini bo'shashtiradi. Asosan oshgan arterial bosimni pasaytiradi va normal arterial bosimga kuchsiz ta'sir qiladi. Magniy ionlari erta va kech trigger faolligi tufayli yuzaga kelgan taxiaritmiyalarda repolyarizatsiyani tezlashtirish va ta'sir potentsiali umumiy davomiyligini qisqartirish (ta'sir potentsiali [2] va [3] fazalariga ta'sir qilish) hisobiga antiaritmik ta'sir ko'rsatadi. EKG da PQ intervalining uzayishi va QRS kompleksi hamda QT intervalining qisqarishi kuzatiladi.

Dori vositasi mushak ichiga yoki vena ichiga sekin yuboriladi (birinchi 3 ml - 3 daqiqa davomida). Vena ichiga yuborilganda bemor yotgan holatda bo'lishi kerak. Kattalarga 1,25-5,0 g dan (5-20 ml 25% eritma) sutkasiga 1-2 marta tayinlanadi. Zaharlanishlarda antidot sifatida vena ichiga 0,25-1,0 g (5-10 ml 5-10% eritma ko'rinishida) yuboriladi. Aritmiyalarni bartaraf etishda vena ichiga sekin 2,0-4,0 g (8- 16 ml 25% eritma) 1-2 daqiqa davomida yuboriladi, so'ngra 2 soat davomida tutib turuvchi infuzion yuborishga o'tiladi. Buning uchun 10 ml 25% eritma 200 ml 5% glyukoza eritmasida yoki kaliy-qutblovchi aralashmada suyultiriladi va 3-20 mg/min (5-30 tomchi/min) tezlikda yuboriladi. Kechki toksikoz, preeklampsiya va eklampsiyani davolashda magniy sulfatni Richard sxemasi bo'yicha yuborish qo'llaniladi: dastlab 4,0 g (16 ml 25% eritma) vena ichiga sekin 3-4 daqiqa davomida, 4 soatdan keyin xuddi shu dozada vena ichiga yuborish takrorlanadi va qo'shimcha ravishda mushak ichiga 5,0 g (20 ml 25% eritma) yuboriladi. Keyinchalik har 4 soatda magniy sulfatni 4,0-5,0 g (16- 20 ml 25% eritma) dozada mushak ichiga yuborish takrorlanadi. Richard sxemasi o'rniga 5,0 g magniy sulfatni (20 ml 25% eritma) 400 ml 0,9% natriy xlorid eritmasi yoki 5% glyukoza eritmasida suyultirib 9-25 mg/min (15-40 tomchi/min) tezlikda vena ichiga tomchilab yuborish mumkin. Bolalarga tirishishlarni bartaraf etish uchun 20-40 mg/kg (0,08-0,16 ml/kg 25% eritma) hisobidan mushak ichiga tayinlanadi.