SEFTRIAKSON SANITA poroshok 1,0g N10

Tseftriakson - beta–laktamlar guruhiga mansub yarimsintetik antibiotik, III avlod sefalosporini, bakteritsid samaraga ega. Ta'sir mexanizmi transpeptidaza fermenti faolligini susaytirish, mikroorganizmlar hujayra devori peptidoglikani biosintezini buzish bilan bog'liq. Preparat keng ta'sir doirasiga ega: aerob grammusbat mikroorganizmlarga nisbatan faol: fakultativ anaeroblar - Staphylococcus aureus (shu jumladan penitsillinaza hosil qiluvchi shtammlar), Staphylococcus epidermidis, Streptococcus pneumoniaе, b-gemolitik A guruh streptokokklar (S.pyogenes), B guruh streptokokklar (S.agalactiae), Streptococcus viridans, Streptococcus bovis, D guruh noenterokokk streptokokklar; grammanfiy mikroorganizmlar: Escherichia coli, Haemophilus influenzae, H.рarainfluenzae, Klebsiella turlari (shu jumladan Kb. pneumoniae), Morganella morganii, Proteus mirabilis, Proteus vulgaris, Providencia, Salmonella (shu jumladan S.typhy), Serratia spp. (shu jumladan S.marcescens), Shigella, Yersinia (shu jumladan Y.enterocolitica); mikroaerofillar – Treponema pallidum; aeroblar - Neisseria gonorrheae (shu jumladan penitsillinaza hosil qiluvchi shtamm), Neisseria meningitides, Pseudomonas aeruginosa; obligat anaeroblar-bakteroidlar turlari (shu jumladan B.Fragilis ning ba'zi shtammlari), Clostridium (lekin С.difficile ning ko'pchilik shtammlari rezistentlikka ega), Peptococcus, Peptostreptococcus, Fusobacterium (shu jumladan F.mortiferum va F.varium). Preparat mikroorganizmlar sefalosporin qatorining boshqa preparatlariga, aminoglikozidlar, penitsillinlarga va b. rezistent bo'lganda tayinlanadi.

Preparat m/i yoki v/i yuboriladi. M/i yuborish uchun yuborish joyidagi og'riqni yo'qotish maqsadida preparat 1% li lidokain eritmasida quyidagi nisbatda eritiladi: 0,5 g flakon ichidagisi 2 ml 1% li lidokain eritmasida, 1 g esa – 3-5 ml da eritiladi. Inyeksiya uchun steril suvdan foydalanish mumkin. V/i yuborish uchun preparat inyeksiya uchun steril suvda quyidagi nisbatda eritiladi: 0,5 g flakon ichidagisi 5 ml erituvchida, 1 g esa – 10 ml da eritiladi. Kattalar va 12 yoshdan katta bolalarga sutkalik 1-2 g dozada tayinlanadi (kuniga 1 marta yoki yarim dozada kuniga 2 marta yuboriladi). Og'ir hollarda sutkalik doza 4 g ni tashkil qiladi, u 12 soat oraliq bilan 2 qabulda yuboriladi. Operatsiyadan keyingi asoratlarni oldini olish uchun bir marta 1-2 g (zararlanish xavfi darajasiga qarab), operatsiyadan 30-90 daqiqa oldin yuboriladi. Buyrak funksiyasi buzilgan bemorlarga dozani to'g'rilash faqat og'ir buyrak yetishmovchiligida (kreatinin klirensi (KK) 10 ml/daq dan kam) zarur. Keksa yoshdagi odamlar uchun dozalar kattalar bemorlar uchun dozalarga mos keladi. Asoratsiz gonoreyada bir marta v/i 0,25 g preparat yuboriladi. Yangi tug'ilgan chaqaloqlar (2 haftagacha) va muddatidan oldin tug'ilgan bolalar uchun preparatning sutkalik dozasi tana vazniga 20-50 mg/kg ni tashkil qiladi. 2 haftalikdan 12 yoshgacha bo'lgan bolalar uchun sutkalik doza tana vazniga 20-80 mg/kg ga teng, 2 marta yuborishda. Tana vazniga 50 mg/kg dan yuqori dozada v/i yuborilganda bolalarga preparat bo'lib-bo'lib, yuborishlar orasida kamida 30 daqiqa tanaffus bilan qo'llaniladi. Preparat bilan davolash davomiyligi patologik jarayonning xarakteri va og'irlik darajasiga bog'liq va bundan tashqari, bakteriologik tekshiruvlar ma'lumotlari bilan belgilanadi. Odatda davolash davomiyligi 4-14 kunni tashkil qiladi. Ammo og'ir infeksion kasalliklarda uzoqroq terapiya talab qilinishi mumkin. Ko'pchilik infeksion kasalliklarda davolash kasallik simptomlari yo'qolgandan va bakteriologik tahlil natijalari bilan samara tasdiqlangandan keyin yana kamida 48-72 soat davom etadi.