Vessel Due F

QO‘LLASH BO‘YICHA YO‘RIQNOMA

VESSEL DUE F

VESSEL DUE F

Preparatning savdo nomi:  Vessel Due F

Ta‘sir etuvchi modda (XPN): sulodeksid

Dori shakli: vena ichiga va mushak ichiga yuborish uchun eritma, kapsulalar

Tarkibi:

Vena ichiga va mushak ichiga yuborish uchun eritma

Har bir ampula (2 ml) quyidagilarni saqlaydi:

faol modda: 600 LB* sulodeksid;

yordamchi moddalar: natriy xloridi, in‘eksiya uchun suv.

Kapsulalar

Har bir kapsula quyidagilarni saqlaydi:

faol modda: 250 LB* sulodeksid;

yordamchi moddalar: natriy laurilsarkozinati, triasetin, kremniy dioksidi;

kapsula qobig‘ining tarkibi: jelatin, gliserol, natriy etilparaoksibenzoati, natriy propilparaoksibenzoati, titan dioksidi (Ye171), temir (III) oksidi (Ye 172).

*- lipoproteinlipaza birligi

Ta‘rifi:

Vena ichiga va mushak ichiga yuborish uchun eritma: och-sariq yoki sariq rangli tiniq eritma.

Kapsula: och-kulrang rangli suspenziya saqlovchi qizg‘ish rangli, yumshoq jelatin kapsulalar.

Farmakoterapevtik guruhi: geparin guruhiga mansub antitrombotik vosita.

ATX kodi: V01AV11

Farmakologik xususiyatlari

Vessel Due F (sulodeksid) cho‘chqaning ingichka ichagining shilliq qavatidan ekstraksiya yo‘li bilan ajratib olingan tabiiy mahsulotdir. Glikozaminoglikanlar (GAG): molekulyar massasi 8000 dalton geparinga o‘xshash fraksiya (80%) va dermatansulfat (20%) ning tabiiy aralashmasi hisoblanadi:

Sulodeksidning ta‘sir mexanizmi ikki asosiy xususiyatlariga bog‘liq: tez ta‘sir qiluvchi geparinga o‘xshash fraksiya antitrombin III (ATIII) ga, dermatanli fraksiyasi esa – geparinning (KGII) II kofaktoriga yaqinlikka ega.

Farmakologik ta‘siri: antikoagulyant, angioprotektiv, profibrinolitik, antitrombotik.

Antikoagulyant ta‘siri trombinni ingibirlovchi geparinning II kofaktoriga yaqinligi hisobiga namoyon bo‘ladi.

Antitrombotik ta‘sir mexanizmi faollashgan X omilni bostirishi, prostasiklinning (PGI₂) sintezi va sekresiyasini kuchayishi, qon plazmasida fibrinogen darajasini kamayishi bilan bog‘liq.

Profibrinolitik ta‘siri qonda plazminogenning to‘qima aktivatori darajasini oshishi va uning ingibitorining miqdorini kamayishi bilan bog‘liq.

Angioprotektiv ta‘siri tomirlarning endoteliy xujayralarining struktur va funksional butunligini tiklanishi, tomirlarning bazal membranalari teshiklarini manfiy elektr zaryadining normal zichligini tiklanishi bilan bog‘liq. Bundan tashqari, preparat trigliseridlar darajasini kamaytirishi hisobiga (PZLPning tarkibiga kiruvchi trigliseridlarni gidrolizlovchi lipolitik ferment – lipoproteinlipazani rag‘batlantiradi), qonning reologik xususiyatlarini normallashtiradi.

Preparatni diabetik nefropatiyada qo‘llashning samaradorligi sulodeksidning bazal membrananing qalinligini va mezangium xujayralarining proliferasiyasini kamaytirish hisobiga, ekstrasellyulyar matriksni ishlab chiqarilishini kamaytirish qobiliyati bilan belgilanadi.

Farmakokinetikasi

Sulodeksidning 90% tomirlarning endoteliysida to‘planadi, bu uning boshqa a‘zolarning to‘qimalaridagi konsentrasiyasidan 20-30 marta yuqori va ingichka ichakda so‘riladi. Asosan jigarda metabolizmga uchraydi va siydik bilan chiqariladi. Fraksiyalanmagan geparin va quyimolekulyar geparinlardan farqli ravishda, antitrombotik faollikni pasayishiga olib keluvchi va organizmdan eliminasiyasini ahamiyatli tezlashtiruvchi desulfatlanishga uchramaydi. Dozani a‘zolar bo‘ylab taqsimlanishi, preparat yuborilganidan keyin 4 soat o‘tgach buyraklar orqali chiqarilishini ko‘rsatdi.

Preparat vena ichiga yuborilganidan keyin 24 soat o‘tgach birikmaning siydik bilan chiqarilishi 50% ni, 48 soat o‘tgach esa – 67% ni tashkil qiladi.

Qo‘llanilishi

• tromb hosil bo‘lishining yuqori xavfi bo‘lgan angiopatiyalar, shu jumladan o‘tkazilgan miokard infarktidan keyin;
• miya qon aylanishini buzilishi, shu jumladan ishemik insultning o‘tkir davri va erta tiklanish davri; ateroskleroz, qandli diabet, gipertoniya kasalligi bilan bog‘liq dissirkulyator ensefalopatiya; tomirli demensiya;
• periferik arteriyalarning ham aterosklerotik va ham diabetik genezga ega bo‘lgan okklyuzion shikastlanishlari;
• flebopatiyalar, chuqur venalarning trombozi;
• mikroangiopatiyalar (nefropatiya, retinopatiya, nefropatiya) va qandli diabetdagi makroangiopatiyalar (diabetik oyoq panjasi sindromi, ensefalopatiya, kardiopatiya);
• trombofilik holatlar, antifosfolipidli sindrom (asetilsalisil kislotasi bilan birga, shuningdek quyimolekulyar geparinlardan keyin buyuriladi);
• geparin induksiyalagan trombotik trombositopeniyani davolash, chunki uni chaqirmaydi va og‘irlashtirmaydi ham.

Qo‘llash usuli va dozalari

Vena ichiga va mushak ichiga yubori uchun eritma.

Ichga qabul qilish uchun kapsulalar.

Davolash preparatning 1 ampulasi ichidagisini har kungi mushak ichiga yuborishdan yoki 15-20 kun davomida, 150-200 ml fiziologik eritmada oldindan eritib, oqim bilan yoki tomchilab vena ichiga yuborishdan boshlanadi. So‘ngra, 30-40 kun davomida davolashni, preparatni ichga qabul qilib davom ettirish kerak: 1 kapsuladan kuniga 2 marta, ovqat qabul qilishlar orasidagi tanaffuslarda buyuriladi. To‘liq davolash kursini 1 yilda kamida 2 marta takrorlash kerak.

Pasientning klinik-diagnostik tekshiruvlarining natijalariga qarab, shifokorning qaroriga qarab dozalash tartibi o‘zgartirilishi mumkin.

Nojo‘ya ta‘sirlari

Me‘da-ichak yo‘llari tomonidan: ko‘ngil aynashi, qusish, epigastral sohada og‘riqlar.

Allergik reaksiyalar: turli joylarda joylashgan teri toshmasi.

Boshqalar: og‘riq, achishish, in‘eksiya joyida gematoma.

Qo‘llash mumkin bo‘lmagan holatlar

• o‘ta yuqori sezuvchanlik;
• gemorragik diatez va qon ivishini pasayishi bilan kechuvchi kasalliklar;
• homiladorlikning I uch oyligi

Dorilarning o‘zaro ta‘siri

Vesel Due F preparatini boshqa preparatlar bilan ahamiyatli darajada o‘zaro ta‘siri aniqlanmagan. Sulodeksid qo‘llanganida antikoagulyantlar (bilvosita va bevosita) va antiagregantlar sifatida gemostaz tizimiga ta‘sir qiluvchi preparatlar bilan bir vaqtda qo‘llash tavsiya qilinmaydi.

Maxsus ko‘rsatmalar

Preparat qo‘llanganida koagulogrammani nazorat qilish kerak. Davolashning boshida va oxirida quyidagi ko‘rsatkichlarni aniqlash maqsadga muvofiqdir: faollashgan qisman tromboplastin vaqti, III antitrombini, qon ketishi vaqti va qon ivishi vaqti.

Vessel Due F faollashgan qisman tromboplastin vaqtining normal ko‘rsatkichlarini taxminan bir yarim marta oshiradi.

Homiladorlik va laktasiya davrida qo‘llanishi

Homiladorlikda shifokorning qat‘iy nazorati ostida buyuriladi. Sulodeksid preparatini diabetning I turi bo‘lgan bemorlarda homiladorlikning II va III uch oyliklarida, homiladorlarning kechki toksikozi rivojlanganida, tomirli asoratlarini davolash va oldini olish maqsadida qo‘llashning ijobiy tajribasi mavjud.

Bolalarda qo‘llanishi

Sulodeksidni bolalarda tasdiqlangan ko‘rsatmalar bo‘yicha ishlatilishi kuzatilmagan.

Sulodeksidni 18 yoshdan kichik bolalarda qo‘llash xavfsizligi va samaradorligi to‘g‘risida ma‘lumotlar aniqlanmagan.

Avtomobilni yoki boshqa mexanizmlarni boshqarish qobiliyatiga ta‘siri

Preparat avtomobilni haydash va mashina qurilmalarini boshqarish qobiliyatiga ta‘sir qilmaydi.

Preparat bolalar ololmaydigan joyda saqlansin va yaroqlilik muddati o‘tgach qo‘llanilmasin.

Dozani oshirib yuborilishi

Simptomlari: qon oquvchanligi yoki qon ketishlar.

Davolash: preparatni bekor qilish, simptomatik davolash.

Chiqarilish shakli

Vena ichiga va mushak ichiga yuborish uchun eritma: 600 LB/2 ml ampulalarda; har bir 2 kontur uyali o‘ramda 5 ampuladan yoki 10 ampuladan 1 kontur uyali o‘ramda qo‘llash bo‘yicha yo‘riqnomasi bilan.

Kapsulalar: 250 LB 25 kapsuladan blisterda; 2 blister qo‘llash bo‘yicha yo‘riqnomasi bilan karton qutida.

Saqlash sharoiti

30^oS dan yuqori bo‘lmagan haroratda.

Yaroqlilik muddati

5 yil.

Dorixonalardan berish tartibi

Resept bo‘yicha.