Portalimizni rivojlantirish maqsadida biz cookiesdan foydalanamiz. Saytdan foydalanishni davom etishingiz, ulardan foydalanishimizga rozilligingizni anglatadi. Batafsil
OK
Toshkent
(71) 268-31-10 Kirish / Ro'yxatdan o'tish Korxona qo'shish

Dimia


Dimia ko'rsatmalar

Umumiy ma'lumot

Ilova-varaqa: Pasient uchun ma‘lumot

Dimia® 3 mg/0,02 mg, plyonka qobiq bilan qoplangan drospirenon va etinilestradiol tabletkalari.

 

Majmuaviy gormonal kontraseptivlar (MGK) to‘g‘risida muhim ma‘lumot:

  • MGK to‘g‘ri qo‘llanilgan taqdirda, qaytariluvchan kontrasepsiyaning eng ishonchli usullaridan biri hisoblanadi;
  • MGK qo‘llanilganda, ayniqsa, birinchi yil qabul qilinishi mobaynida yoki tanaffusdan so‘ng qabul qilish tiklanganda 4 yoki undan ortiq hafta mobaynida vena va arteriyalarda qon ivib qolishi (tromb) paydo bo‘lishining biroz kuchaygan xavfi mavjud bo‘ladi;
  • Iltimos, agar Sizda tromboz simptomlari bor deb o‘ylasangiz, e‘tiborli bo‘ling va shifokorga murojaat qiling (“Tromblar” 2-bo‘limiga qarang).

 

Ushbu preparatni qabul qilishni boshlashdan oldin ilova-varaqani diqqat bilan to‘liq o‘qib chiqing, chunki unda Siz uchun muhim ma‘lumotlar berilgan.

– Ushbu ilova-varaqani saqlab qo‘ying. Uni yana bir marta o‘qib chiqish zarurati yuz berishi mumkin;

– Sizda qo‘shimcha savollar bo‘lsa, shifokorga yoki farmasevtga murojaat qiling;

– Ushbu preparat faqat Siz uchun mo‘ljallangan. Uni boshqa shaxslarga bermang. Ushbu preparat ularga ziyon yetkazishi mumkin;

– Har qanday nojo‘ya samaralar paydo bo‘lgan taqdirda, iltimos, bu to‘g‘risida shifokorga yoki farmasevtga xabar bering. Ushbu ilova-varaqada qayd etilmagan nojo‘ya samaralarga ham taalluqli (4-bo‘limga qarang).

 

Ushbu ilova-varaqa mundarijasi:

  1. Dimia® qanday preparat va u nima uchun qo‘llaniladi
  2. Dimia® preparat qabul qilishdan oldin nimalarni bilish kerak
  3. Dimia® preparatini qanday qabul qilinadi
  4. Ehtimoliy nojo‘ya samaralar
  5. Dimia® preparatni qanday saqlash kerak
  6. O‘ram tarkibi va qo‘shimcha ma‘lumotlar

  1. Dimia® qanday preparat va u nima uchun qo‘llaniladi
  • Dimia® tabletkalardagi kontraseptivlardan iborat bo‘lib, homiladorlik boshlanishining oldini olish maqsadida foydalaniladi.
  • O‘ramdagi 24 ta oq rangli tabletkadan har biri tarkibida kam miqdorli ikkita har xil gormon mavjud bo‘lib, ular drospirenon va etinilestradiol deb nomlanadi.
  • 4 ta yashil tabletka tarkibida faol moddalar mavjud emas, shu tufayli ham plasebo deb nomlanadi.
  • Tarkibida ikkita gormon mavjud kontraseptiv tabletkalar majmuaviy tabletkalar deb nomlanadi.

  1. Dimia® plyonka qobiq bilan qoplangan preparatni qabul qilishdan oldin nimalarni bilish kerak?

Umumiy ma‘lumotlar

Dimia® preparatni qabul qilishni boshlashingizdan oldin, Siz 2-bo‘limda taqdim qilingan tromb paydo bo‘lishi to‘g‘risidagi ma‘lumotlarni o‘qib chiqishingiz kerak. Tromb paydo bo‘lishining ehtimoliy simptomlari to‘g‘risida bilish juda muhim – “Tromblar” 2-bo‘limiga qarang.

Dimia® preparatini qabul qilishga kirishishingizdan oldin, shifokor Sizga o‘z sog‘lig‘ingiz va yaqin qarindoshlaringiz sog‘lig‘i to‘g‘risida bir necha savollar beradi. Shifokor Sizning arterial qon bosimingizni o‘lchaydi va Sizning ahvolingizga qarab, bir necha tahlillar (analizlar) tayinlashi ham mumkin.

Ushbu ilova-varaqada Dimia® preparatini qabul qilish to‘xtatilishini talab qiladigan yoki Dimia® preparatining ishonchliligi pasayishi mumkin bo‘lgan bir necha vaziyatlar qayd etilgan. Bunday vaziyatlarda Siz yoxud jinsiy aloqalardan saqlanishingiz, yoxud kontrasepsiyaning nogormonal usullari, masalan, prezervativ yoki boshqa to‘siqli usullardan foydalanishingiz kerak.

Kalendar yoki harorat usullaridan foydalanmang. Ular ishonchsiz bo‘lishi mumkin, chunki Dimia® preparati haroratning har oylik tebranishlari manzarasini va servikal shilliq sifatini o‘zgartiradi.

Dimia®, boshqa gormonal kontraseptivlar kabi OIV-infeksiyalari (OITS) yoki jinsiy yo‘l bilan yuqadigan har qanday boshqa kasalliklar o‘tishidan himoya qilmaydi.

 

Dimia® preparatidan quyidagi holatlarda foydalanmang:

Sizda quyida qayd etilgan holatlar mavjud bo‘lgan taqdirda, Dimia® preparatini qabul qilinmasligi kerak. Agar Sizda quyida qayd etilgan biror-bir holat mavjud bo‘lsa, iltimos, shifokorga bu to‘g‘risida xabar bering. Shifokoringiz Siz bilan tug‘ilish miqdorini nazorat qilishning mos muqobil usullarini muhokama qiladi.

Dimia® preparatidan quyidagi holatlarda foydalanmang:

  • agar Sizda oyoq tomirlarida tromblar (chuqur venalar trombozi (CHVT)), o‘pka tomirlarida (o‘pka arteriyasining tromboemboliyasi (O‘ATE)) yoki boshqa organlarda tromblar bo‘lsa (yoki qachondir yuzaga kelgan bo‘lsa);
  • agar Sizda yuqori tromb paydo bo‘lishi bilan birga kechadigan kasalliklar, masalan, S proteini tanqisligi, S proteini tanqisligi, III antitrombin tanqisligi, V Leyden omili yoki fosfolipidlarga antitelalar mavjudligidan xabardor bo‘lsangiz;
  • agar Sizga operasiya qilish talab etilsa yoki agar Siz uzoq vaqt mobaynida piyoda yurmayotgan bo‘lsangiz (“Tromblar” bo‘limiga qarang);
  • agar Sizda qachondir infarkt yoki insult yuz bergan bo‘lsa;
  • agar Sizda stenokardiya (ko‘krakda qattiq og‘riqni paydo qiladigan va infarktning birinchi alomati bo‘lishi mumkin bo‘lgan holat) yoki vaqtincha miyada qon aylanishi buzilishi (VMKB – insultning vaqtincha simptomlari) kasalliklari bo‘lsa (yoki qachondir yuzaga kelgan bo‘lsa);
  • agar Sizda arteriya trombozi xavfini kuchaytirishi mumkin bo‘lgan quyida qayd etilgan kasalliklardan biri mavjud bo‘lsa:
  • tomirlar shikastlanishini o‘z ichiga oladigan og‘ir diabet;
  • juda yuqori arterial qon bosim;
  • qon tarkibida lipidlar (xolesterin yoki trigliseridlar)ning juda yuqori darajasi;
  • gipergomosisteinemiya deb nomlanadigan holat;
  • agar Sizda “aurali migren” deb nomlanadigan qattiq bosh og‘rig‘i bo‘lsa (yoki qachondir yuzaga kelgan bo‘lsa);
  • agar Sizda jigar kasalligi bo‘lsa (yoki qachondir yuzaga kelgan bo‘lsa) va jigarning funksional namunalari hamon me‘yordan chetga chiqayotgan bo‘lsa;
  • agar Sizning buyraklaringiz yetarlicha yaxshi ishlamayotgan (buyrak yetishmovchiligi);
  • agar Sizda jigar o‘smasi bo‘lsa (yoki qachondir yuzaga kelgan bo‘lsa);
  • agar Sizda ko‘krak saraton kasalligi yoki jinsiy organlar saraton kasalligi bo‘lsa (yoki qachondir yuzaga kelgan bo‘lsa) yoxud mavjudligiga shubhalansangiz;
  • agar Sizda sababi noma‘lum vaginal qon ketish kuzatilayotgan bo‘lsa;
  • agar Sizda etinilestradiol yoki drospirenonga yoki har kanday prepartni tarkibiy moddalaridan biriga allergiya bo‘lsa (6-bo‘limda qayd etilgan). Allergiya qichishish, toshma yoki shishish orqali namoyon bo‘lishi mumkin;
  • Dimia® tarkibida soya moyi mavjud. Agar Sizda yer yong‘oqqa yoki soya moyiga allergiya bo‘lsa, ushbu dori preparatini qabul qilmang.

 

Maxsus ko‘rsatmalar va ehtiyotkorlik choralari

Dimia® preparatini qabul qilishdan oldin shifokor yoki farmasevt bilan maslahatlashing.

Qaysi holatda shifokorga murojaat qilish kerak?

Quyidagi holatlarda zudlik bilan tibbiy yordam uchun murojaat qiling:

–                     agar Siz trombozning ehtimoliy alomatlarini sezib qolgan bo‘lsangiz: bu oyoq tomirlaridagi tromblar (masalan, chuqur venalar trombozi), o‘pka tomirlaridagi tromblar (masalan, o‘pka arteriyasining tromboemboliyasi), infarkt yoki insultdan iborat bo‘lishi mumkin (quyida “Tromblar” bo‘limiga qarang).

Ushbu jiddiy nojo‘ya samaralar simptomlarining tavsifi “Trombozlarni qanday aniqlash kerak” bo‘limida keltirib o‘tilgan.

Quyida qayd etilgan biror-bir holat Sizga daxldor bo‘lsa shifokorga xabar bering.

Ayrim vaziyatlarda Dimia® preparatini yoki har qanday boshqa majmuaviy kontraseptiv preparatini qabul qilishda alohida ehtiyotkorlikka rioya qilish kerak. Ehtimol, shifokor Sizni muntazam ko‘rikdan o‘tkazishi talab qilinishi mumkin. Agar quyida qayd etilgan biror-bir holat Sizga daxldor bo‘lsa, Dimia® preparatini qabul qilish boshlangunga qadar shifokorni bu to‘g‘risida xabardor qilishingiz kerak:

  • agar Sizning yaqin qarindoshingizda ko‘krak saraton kasalligi bo‘lsa yoki qachondir yuzaga kelgan bo‘lsa;
  • agar Sizda jigar yoki o‘t pufagi kasalligi bo‘lsa;
  • agar Sizda diabet kasalligi bo‘lsa;
  • agar Sizda depressiya holatlari bo‘lsa;
  • agar Sizda Kron yoki yarali kolit kasalligi (surunkali ichak yallig‘lanishi kasalligi) bo‘lsa;
  • agar Sizda tizimli qizil teri sili (tizimli qizil teri sili – Sizning immun tizimingiz faoliyatini buzuvchi kasallik) bo‘lsa;
  • agar Sizda gemolitik-uremik sindrom (GUS – qondagi tromblar buyrak yetishmovchiligini yuzaga keltiradigan kasallik) bo‘lsa;
  • agar Sizda o‘roqsimon-hujayraviy anemiya (qon qizil hujayralari o‘zgarishi bilan birga kechadigan irsiy kasallik) bo‘lsa;
  • agar Sizda qon tarkibida lipidlar darajasi yuqori bo‘lsa (gipertrigliseridemiya) yoki oilada quyidagi kasallik mavjud bo‘lsa: pankreatit rivojlanishi yuqori xavfi bilan bog‘liq gipertrigliseridemiya (oshqozonosti bezi yallig‘lanishi);
  • agar Sizga operasiya qilish talab etilsa yoki agar Siz uzoq vaqt mobaynida piyoda yurmayotgan bo‘lsangiz (“Tromblar” 2-bo‘limiga qarang);
  • agar Siz yaqindagina tuqqan bo‘lsangiz, Sizda tromb paydo bo‘lishi xavfi kuchaygan bo‘ladi. Tug‘ishdan so‘ng qancha muddatdan keyin Dimia® preparatini qabul qilishni boshlash mumkinligini shifokordan so‘rang;
  • agar Sizda teriosti venalar yallig‘lanishi kasalligi (sirtqi tromboflebit) bo‘lsa;
  • agar Sizda venalarning varikoz kengayishi kasalligi bo‘lsa;
  • agar Sizda epilepsiya kasalligi bo‘lsa (“Dimia® preparatining boshqa dori vositalari bilan o‘zaro ta‘siri” bo‘limiga qarang);
  • agar Sizda homiladorlik davrida yoki bundan oldin jinsiy gormonlar preparatini qabul qilish sharoitida birinchi marta paydo bo‘lgan kasallik (masalan, eshitish qobiliyati yo‘qotilishi, porfiriya qon kasalligi, homiladorlik davrida pufakchalar ko‘rinishida teri toshmasi (homiladorlar gerpesi), tartibsiz harakatlanishni yuzaga keltiradigan (Sidengam shaytonlashi) asab tizimi kasalligi) bo‘lsa;
  • agar Sizda, ayniqsa, yuzingizda “homiladorlar dog‘lari” deb nomlanadigan bronza rangli pigment dog‘lar (xloazma) bo‘lsa yoki qachondir yuzaga kelgan bo‘lsa; bunday holatda bevosita quyosh nuri tushishidan yoki ultrabinafsha nurlar ta‘siriga yo‘l qo‘ymang;
  • agar Sizda irsiy angionevrotik shish bo‘lsa, estrogenlar simptomlarni yuzaga keltirishi yoki og‘irlashtirishi mumkin; agar Sizda yuz, til va/yoki tomoq shishishi va/yoki yutinishda qiyinchilik yoki toshma va nafas olish qiyinlashishi bilan namoyon bo‘ladigan angionevrotik shish rivojlanayotgan bo‘lsa, zudlik bilan shifokorga murojaat qilish kerak.

Agar Dimia® preparatini qabul qilish sharoitida Sizning ahvolingiz yomonlashsa, bu to‘g‘risida shifokorni xabardor qilish kerak.

Dimia® preparatini qabul qilishdan oldin shifokor bilan maslahatlashing.

 

TROMBLAR

Dimia® preparati kabi majmuaviy gormonal kontraseptivlarni qabul qilish ushbu preparatini qabul qiluvchilarda mazkur preparatini qabul qilmaydiganlarga nisbatan tromblar paydo bo‘lish xavfi kuchayadi. Kamdan-kam holatlarda tromb tomirda qon oqimini bekitib qo‘yishi va jiddiy muammolarni yuzaga keltirishi mumkin.

Tromblar quyidagicha paydo bo‘lishi mumkin:

  • venalarda (“vena trombozi”, “vena tromboemboliyasi” yoki VTE);
  • arteriyalarda (“arterial tromboz”, “arterial tromboemboliya” yoki ATE).

Trombozdan so‘ng har doim ham to‘liq sog‘ayib ketish kuzatilavermaydi. Kamdan-kam holatlarda ushbu holat jiddiy uzoq muddatli ta‘sirlarni yuzaga keltirishi va juda kamdan-kam holatlarda o‘lim holatiga olib kelishi mumkin.

Shuni yodda tutish muhimki, Dimia® preparatini qabul qilish sharoitida xavfli trombozning umumiy xavfi past darajali hisoblanadi.

TROMBOZNI QANDAY ANIQLASH KERAK

Agar Siz quyida qayd etilgan alomatlar yoki simptomlardan birini sezib qolsangiz, zudlik bilan tibbiy yordam uchun murojaat qiling.

Sizda ushbu simptomlar kuzatiladimi? Bu nima bo‘lishi mumkin?
–       bir oyoq shishishi yoxud oyoq yoki tovondagi venalar bo‘ylab shishganlik, ayniqsa, quyidagilar bilan muvofiqlikda:

–       faqat tik turgan holatda yoki piyoda yurish vaqtidagina Siz his qiladigan oyoqdagi og‘riq yoki og‘rig‘i zo‘rlik;

–       shikastlangan oyoq isishi;

–       oyoq terisi rangining o‘zgarishi, masalan, oqarishi, qizarishi yoki ko‘karib qolishi.

 Chuqur venalar trombozi
–       to‘satdan nafas olish qiyinlashishi yoki tez-tez nafas olish;

–       aniq sababsiz to‘satdan yo‘tal tutishi, qon aralash bo‘lishi mumkin;

–       chuqur nafas olinganda kuchayishi mumkin bo‘lgan ko‘krakdagi kuchli og‘riq;

–       ifodalangan behuzurlik yoki bosh aylanishi;

–       tez-tez yoki noritmik yurak urishi;

–       qorinda kuchli og‘riq.

 

Agar Siz shubhalansangiz, ushbu simptomlar to‘g‘risida, masalan, yo‘tal yoki nafas siqilishi to‘g‘risida shifokor bilan maslahatlashing. Ular unchalik jiddiy bo‘lmagan holat, masalan, nafas olish yo‘llari infeksiyasi (ya‘ni, “shamollashlar”) alomati bo‘lishi mumkin.

 O‘pka arteriyasi tromboemboliyasi
Simptomlar ko‘proq bitta ko‘z tomonidan kuzatiladi:

–       to‘satdan ko‘rish qobiliyatining yo‘qotilishi yoki

–       ko‘rish qobiliyati yo‘qotilgunga qadar kuchayib boradigan noaniq ko‘rish (og‘riqli sezgilarsiz).

 To‘rparda venalari trombozi (ko‘zdagi tromb)
–       ko‘krakdagi og‘riq, o‘zini noqulay sezish, bosim, o‘zini og‘ir his qilish;

–       qo‘lda yoki ko‘krak suyagi ostida, ko‘krak qisishi yoki to‘lib ketishi hissi;

–       to‘lib ketishi, ovqat hazm bo‘lishi buzilishi yoki bo‘g‘ilish hissi;

–       bel, pastki jag‘, tomoq, qo‘l va oshqozonga tarqalishi (irradiasiyasi) bilan birga kechadigan tananing yuqori qismidagi noqulaylik;

–       ko‘p terlash, ko‘ngil aynishi, qayt qilish va bosh aylanishi;

– nihoyat darajada holsizik, xavotirlanish yoki nafas siqilishi;

– tez-tez yoki noritmik yurak urishi.

 Miokard infarkti
–       to‘satdan holsizlanish yoki yuz, qo‘l va oyoqlarning uvushib qolishi, ayniqsa, tananing bir tomonidan;

–       to‘satdan yuzaga kelgan fikrlashdagi chalkashlik, nutq yoki anglash buzilishi;

–       to‘satdan bir yoki har ikki ko‘zda ko‘rish qobiliyati buzilishi;

–       to‘satdan yurishdagi murakkabliklar, bosh aylanishi, harakatlanishdagi muvozanat va koordinasiyaning buzilishi;

–       ma‘lum sabablarsiz to‘satdan, ifodalangan yoki uzoq vaqt davom etadigan bosh og‘rig‘i;

–       hushdan ketish yoxud tomir tortishish yoki tomir tortishishsiz behuzurlik hissi.

 

Ba‘zan insult simptomlari deyarli shu zahoti o‘z-o‘zidan to‘xtatiladi, sog‘liq to‘liq tiklanadi, biroq Siz har qanday holatda ham zudlik bilan shifokorga murojaat qilishingiz kerak, chunki Siz takroriy insult xavfiga duch kelishingiz mumkin.

 Insult
–       qo‘l-oyoqlarning shishishi yoki ko‘karib qolishi;

–       qorindagi kuchli og‘riq (o‘tkir qorin og‘rig‘i).

 Tromblar boshqa tomirlarni berkitib qo‘yadi

VENA TROMBOZLARI

Agar venada tromb paydo bo‘lsa, nima yuz berishi mumkin?

  • Majmuaviy gormonal kontraseptivlarning qo‘llanilishi venalarda tromblar paydo bo‘lishi (vena trombozi) xavfining kuchayishi bilan bog‘liq. Shunga qaramay, ushbu nojo‘ya samaralar kamdan-kam holatlarda yuz beradi. Ko‘pincha ular majmuaviy gormonal kontraseptivlarning birinchi yil qo‘llanilishi mobaynida paydo bo‘ladi.
  • Agar tromb oyoq yoki tovon venasida paydo bo‘lsa, u chuqur venalar trombozini (CHVT) yuzaga keltirishi mumkin.
  • Agar tromb oyoq tomirlaridan ko‘chib, o‘pka tomirlarida tiqilib qolsa, u o‘pka emboliyasini yuzaga keltirishi mumkin.
  • Juda kamdan-kam holatlarda tromb boshqa organ, masalan, ko‘z vena tomirida (to‘rparda venalari trombozi) yuzaga kelishi mumkin.

Vena trombi paydo bo‘lish xavfi qachon eng yuqori bo‘ladi?

Vena trombining paydo bo‘lish xavfi birinchi marta tayinlangan majmuaviy gormonal kontraseptivning birinchi yil qo‘llanilishi mobaynida eng yuqori bo‘ladi. Agar Siz tanaffusdan so‘ng 4 yoki undan ortiq hafta mobaynida majmuaviy gormonal kontraseptiv (xuddi shunday yoki boshqa preparat) qabul qilinishini takroran boshlasangiz ham venada qon ivib qolishi (tromb) yuzaga kelish xavfi yuqori bo‘lishi mumkin.

Birinchi yildan so‘ng vena trombining paydo bo‘lish xavfi pasayadi, biroq baribir majmuaviy gormonal kontraseptiv qabul qilmayotganlarga nisbatan biroz yuqori bo‘lib qoladi.

Dimia® preparati qo‘llanilishi bekor qilingandan so‘ng trombning paydo bo‘lishi bir necha hafta mobaynida me‘yoriy ko‘rsatkichga qaytadi.

Tromb paydo bo‘lish xavfi qanday?

Trombning paydo bo‘lish xavfi Sizning o‘z vena tromboemboliya xavfiga va Siz qabul qilayotgan majmuaviy gormonal kontraseptiv turiga bog‘liq bo‘ladi.

Oyoq yoki o‘pka tomirlarida tromb (CHVT yoki O‘ATE) paydo bo‘lish umumiy xavfi Dimia® preparatini qabul qilish sharoitida juda kichik darajada bo‘ladi:

  • majmuaviy gormonal kontraseptivlarni qabul qilmayotgan va homilador bo‘lmagan 10000 nafar ayoldan bir yil ichida taxminan 2 nafarida tromboz rivojlanadi;
  • tarkibida levonorgestrel, noretisteron yoki norgestimat mavjud bo‘lgan majmuaviy gormonal kontraseptivni qabul qilayotgan 10000 nafar ayoldan bir yil ichida taxminan 5-7 nafarida tromboz rivojlanadi;
  • tarkibida drospirenon, masalan, Dimia® dori vositasi mavjud bo‘lgan majmuaviy gormonal kontraseptivni qabul qilayotgan 10000 nafar ayoldan bir yil ichida taxminan 9-12 nafarida tromboz rivojlanadi.

Har bir muayyan bemor uchun tromboz xavfi bir-biridan farq qiladi (quyidagi “Vena trombi paydo bo‘lishining xavfini oshiradigan omillar” bo‘limiga qarang).

  Bir yil ichida tromboz rivojlanishi xavfi
Tabletkalar/plastirlar/halqalar ko‘rinishidagi majmuaviy gormonal kontraseptivlarni qabul qilmayotgan va homilador bo‘lmagan ayollar 10000 nafar ayolga taxminan 2 ta holat
Tarkibida levonorgestrel, noretisteron yoki norgestimat mavjud bo‘lgan tabletkalar ko‘rinishidagi majmuaviy gormonal kontraseptivlarni qabul qilayotgan ayollar 10000 nafar ayolga taxminan 5-7 ta holat
Tarkibida drospirenon, masalan, Dimia® dori vositasi mavjud bo‘lgan tabletkalar ko‘rinishidagi majmuaviy gormonal kontraseptivlarni qabul qilayotgan ayollar 10000 nafar ayolga taxminan 9-12 ta holat

 

Vena trombi paydo bo‘lishining xavfini oshiradigan omillar

Dimia® preparatini qabul qilish sharoitida trombning paydo bo‘lish xavfi darajasi kam bo‘ladi, biroq ayrim holatlarda u ko‘payishi mumkin. Quyidagi holatlarda Siz xavf guruhida bo‘lasiz:

  • agar Sizda ortiqcha vazn bo‘lsa (tana og‘irligi indeksi eng kamida 30 kg/m2);
  • agar Sizning yaqin qarindoshingiz yoshligida (50 yoshdan kichik yoshda) oyog‘ida, o‘pkasida yoki boshqa organida tromboz yuzaga kelgan bo‘lsa; bunday holatda Sizda irsiy qon quyulishi kasalligi bo‘lishi mumkin;
  • agar Sizga operasiya talab qilinsa yoki Siz jarohatlanish yoki kasallik tufayli uzoq vaqt harakatsiz holatda bo‘lsangiz yoxud Sizning oyog‘ingiz gipslangan bo‘lsa; operasiyagacha bir necha hafta oldin yoki Siz kamroq harakatlanayotgan davr mobaynida Dimia® preparatini qo‘llanilishini bekor qilish kerak. Agar Siz Dimia® preparatini qo‘llanilishini bekor qilishingiz zarur bo‘lsa, ushbu preparatni qabul qilishni qachon tiklash mumkinligi to‘g‘risida shifokor bilan maslahatlashing;
  • agar Siz 35 yoshdan katta yoshda bo‘lsangiz;
  • agar Siz bir necha hafta oldin tuqqan bo‘lsangiz.

Sizda xavf omillari qanchalik ko‘p bo‘lsa, Siz uchun tromb paydo bo‘lishi xavfi shunchalik yuqori bo‘ladi.

Samolyotda uchishlar (4 soatdan ko‘proq davomiylikda), ayniqsa, agar Sizda yuqorida qayd etilgan boshqa xavf omillari mavjud bo‘lsa, tromboz xavfini vaqtincha oshirishi mumkin.

O‘zingizdagi mavjud holatlar to‘g‘risida ikkilanayotgan bo‘lsangiz ham shifokorni xabardor qilish juda muhim. Shifokoringiz Dimia® preparatini qabul qilishni to‘xtatish kerakligini tavsiya etishi mumkin.

Siz ushbu preparatni qabul qilayotgan vaqt mobaynida nimadir o‘zgarsa, masalan, Sizning qarindoshingizda noma‘lum sabab bo‘yicha tromboz paydo bo‘lsa yoki Sizning vazningiz sezilarli og‘irlashgan bo‘lsa, bu to‘g‘risida shifokorni xabardor qiling.

ARTERIAL TROMBOZLAR

Agar arteriyada tromb paydo bo‘lsa nima yuz berishi mumkin?

Vena trombi kabi arteriya trombi ham jiddiy muammolarni yuzaga keltirishi mumkin. Masalan, u infarkt yoki insultga sabab bo‘lishi mumkin.

Arterial tromb paydo bo‘lishi xavfini kuchaytiradigan omillar

Shuni qayd etish muhimki, Dimia® preparatini qabul qilish sharoitida infarkt yoki insult xavfi kam hisoblanadi, biroq quyidagi holatlarda kuchayishi mumkin:

  • yosh ulg‘aygan sayin (35 yoshdan katta yoshda);
  • agar Siz tamaki cheksangiz. Agar Siz majmuaviy gormonal kontraseptivlarni, masalan, Dimia® qabul qilayotgan bo‘lsangiz, chekishni tashlashingiz kerak. Agar Siz chekishni tashlay olmasangiz va 35 yoshdan katta yoshda bo‘lsangiz, shifokor Sizga boshqa kontrasepsiya usulini tavsiya etishi mumkin;
  • agar Sizda ortiqcha vazn bo‘lsa;
  • agar Sizda arterial qon bosim yuqori bo‘lsa;
  • agar Sizning yaqin qarindoshingizda yoshligida (50 yoshdan kichik yoshda) infarkt yoki insult yuz bergan bo‘lsa. Bunday holatda, Sizda infarkt yoki insult xavfi yuqori bo‘ladi;
  • agar Sizning yaqin qarindoshingizda qon tarkibida lipidlar (xolesterin yoki trigliseridlar) darajasi yuqori bo‘lsa;
  • agar Sizda “aurali migren” deb nomlanadigan qattiq bosh og‘rig‘i bo‘lsa;
  • agar Sizda yurak bilan bog‘liq muammolar bo‘lsa (klapanlar kasalliklari, yurak bo‘lmasi fibrillyasiyasi deb nomlanadigan yurak urish maromi buzilishi);
  • agar Sizda diabet kasalligi bo‘lsa.

Agar Sizda yuqorida qayd etilgan holatlardan bittadan ortiq holat mavjud bo‘lsa yoki agar ulardan biror-biri Sizda ayniqsa ifodalangan darajada kechayotgan bo‘lsa, tromboz xavfi yanada yuqori bo‘ladi.

Agar Sizda Dimia® preparatini qabul qilayotgan vaqtingizda nimadir o‘zgarsa, masalan, Siz chekishni boshlasangiz yoki Sizning qarindoshingizda noma‘lum sabab bo‘yicha tromboz paydo bo‘lsa yoki Sizning vazningiz sezilarli og‘irlashgan bo‘lsa, bu to‘g‘risida shifokorni xabardor qiling.

Dimia® va saraton kasalligi

Tabletkalarda majmuaviy preparatlarni qabul qiluvchi ayollarda sut bezlari saraton kasalligi nisbatan ko‘proq uchraydi, biroq buning terapiya bilan bog‘liq yoki bog‘liq emasligi noma‘lum. Masalan, bu ko‘pincha aniqlanadigan o‘smalar bilan bog‘liq bo‘lishi mumkin, chunki majmuaviy kontraseptivlarni qabul qiluvchi ayollar ko‘proq shifokor qabulida bo‘ladilar.

Majmuaviy gormonal kontraseptivlarni qabul qilish bekor qilingandan so‘ng, sut bezlari o‘smalari tez-tezligi asta-sekin pasayib boradi. Sut bezlari holatini muntazam tekshirib borish va agar Siz qattiqlik sezsangiz albatta shifokorga murojaat qilish kerak.

Kamdan-kam holatlarda kontraseptivlarni qabul qilgan ayollarda jigar xavfsiz o‘smalari, nisbatan ko‘proq xavfli o‘smalari qayd etilgan. Agar Sizni qorindagi odatdagidan boshqacha kuchli og‘riq bezovta qilsa, shifokorga murojaat qiling.

Hayz davri (menstruasiyalar) o‘rtasida qon ketishi

Dimia® preparatini birinchi oylar qabul qilish mobaynida Sizda kutilmagan qon ketishlar kuzatilishi mumkin (plasebo qabul qilishdan tashqari). Agar bunday holat bir necha oy davom etsa yoki bir necha oydan keyin boshlansa, shifokor ko‘rigidan o‘tishingiz kerak.

Plasebo qabul qilish vaqtida qon ketish holati yuz bermasa nima qilish kerak?

Agar Siz hamma oq rangli tabletkalarni to‘g‘ri qabul qilgan bo‘lsangiz, Sizda qayt qilish yoki ifodalangan diareya holatlari yuz bermagan bo‘lsa va Siz boshqa hech qanday preparatlarni qabul qilmagan bo‘lsangiz, homilador bo‘lish ehtimoli juda kam.

Agar qon ketish ikki marta takrorlanmagan bo‘lsa, Siz homilador bo‘lishingiz ehtimoli mavjud. Zudlik bilan shifokorga murojaat qiling. Homiladorlik yo‘qligiga aniq ishonchingiz komil bo‘lmagungacha navbatdagi qadoq idishdagi dori-darmon vositasini qabul qilishni boshlamang.

Dimia® preparatining boshqa dori vositalari bilan o‘zaro ta‘siri

Agar Siz boshqa har qanday dori vositasini qabul qilgan bo‘lsangiz, qabul qilayotgan bo‘lsangiz yoki kelgusida qabul qilsangiz bu to‘g‘risida shifokorni yoki farmasevtni xabardor qiling.

Shifokorni hozirda qanday preparatlar yoki dorivor o‘simlik vositalarini qabul qilayotganligingiz to‘g‘risida har doim xabardor qiling. Shuningdek, Sizga boshqa preparatni tayinlayotgan shifokorni yoki stomatologni (yoki farmasevtni) Dimia® preparatini qabul qilayotganligingiz to‘g‘risida xabardor qiling.

Shifokor Sizga qo‘shimcha kontraseptiv vositalari (masalan, prezervativlar)dan qanday davriylikda foydalanish kerakligi yoki kerak emasligini aytadi.

Ayrim preparatlar Dimia® preparatining qondagi faol moddalari konsentrasiyasiga ta‘sir ko‘rsatishi, ularning qabul qilinishi kontraseptiv samaradorligini pasaytirishi va qon ketishi kuchayishiga olib kelishi mumkin. Bunday dori vositalariga quyidagi kasalliklarni davolash uchun prepartlaridan iborat:

  • tutqanoq kasalliklari (masalan, primidon, fenitoin, barbituratlar, karbamazepin, okskarbazepin);
  • sil kasali (masalan, rifampisin);
  • OIV-infeksiyalari va S gepatiti (qayta transkriptaza nonukleozid ingibitorlari hamda ritonavir, nevirapin va efavirenz kabi proteaz ingibitorlari) va boshqa infeksiyalar (grizeofulvin);
  • o‘pka tomirlarida yuqori arterial qon bosim (bozentan) va
  • teshik dalachoy dorivor o‘simligi vositasi.

Dimia® quyidagi kabi boshqa preparatlar samaradorligini pasaytirishi mumkin:

  • tarkibida siklosporin mavjud;
  • yoki lamotridjin antiepileptik preparati (bu tomir tortishishlar epizodlari tez-tezligi oshishiga olib kelishi mumkin).

Biror-bir preparatni qabul qilishdan oldin maslahat uchun shifokorga yoki farmasevtga murojaat qiling.

Dimia® ovqat va ichimlik iste‘moli bilan muvofiqlikda

Dimia® preparatini ovqat iste‘molidan qat‘iy nazar, zarur hollarda ustidan kam miqdorli suv ichish orqali qabul qilish mumkin.

Laboratoriya tahlillari (analizlari) natijalari

Agar Sizga qon analizi tayinlangan bo‘lsa, Siz tabletkalarda gormonal kontraseptiv preparatini qabul qilayotganligingiz to‘g‘risida shifokorni yoki laboratoriya mutaxassislarini xabardor qiling, chunki bu ayrim analizlar natijalarini o‘zgartirishi mumkin.

Homiladorlik va emizish davri

Agar Siz homilador bo‘lsangiz yoki bola emizsangiz yoki homilador ekanligingizni taxmin qilsangiz yoki homiladorlikni rejalashtirayotgan bo‘lsangiz, ushbu preparatni qabul qilishdan oldin shifokor yoki farmasevt bilan maslahatlashing.

Homiladorlik

Agar Siz homilador bo‘lsangiz, Sizga Dimia® preparatini qabul qilish mumkin emas. Agar Siz Dimia® preparatini qabul qilish davrida homilador bo‘lsangiz, Siz zudlik bilan ushbu preparatini qabul qilishni to‘xtatishingiz va shifokorga murojaat qilishingiz kerak.

Agar Siz homilador bo‘lsangiz, Dimia® preparatini qabul qilishni istalgan paytda to‘xtatishingiz mumkin (shuningdek, “Agar Siz Dimia® preparatini qabul qilishni to‘xtatgan bo‘lsangiz” bo‘limiga qarang).

Biror-bir preparatni qabul qilishdan oldin maslahat uchun shifokorga yoki farmasevtga murojaat qiling.

Emizish davri

Agar Siz bola emizayotgan bo‘lsangiz, Dimia® preparatini qabul qilish tavsiya etilmaydi. Agar Siz bola emizishni davom ettirgan holda ushbu preparatni qabul qilishni davom ettirmoqchi bo‘lsangiz, shifokoringizga murojaat qiling.

Biror-bir preparatni qabul qilishdan oldin maslahat uchun shifokorga yoki farmasevtga murojaat qiling.

 

Transport vositasini boshqarish va mexanizmlar bilan ishlash qobiliyatiga ta‘siri

Dimia® transport vositasini boshqarish va mexanizmlar bilan ishlash qobiliyatiga biror-bir ta‘siri to‘g‘risida ma‘lumotlar yo‘q.

Dimia® tarkibida laktoza, “sariq shaffov” bo‘yoq moddasi va soya lesitini mavjud.

Dimia® plyonka qobiq bilan qoplangan preparati oq rangli tabletkalari tarkibida 48,53 mg monogidrat laktoza, plyonka qobiq bilan qoplangan yashil nofaol tabletkalar, shuningdek 37,26 mg suvsiz laktoza mavjud. Agar shifokor Sizda ayrim shakar moddalariga o‘zlashtiraolmaslik simptomlarini qayd etgan bo‘lsa, ushbu dori vositasini qabul qilishdan oldin shifokorga murojaat qiling.

Tarkibida gormonlar mavjud bo‘lmagan plyonka qobiq bilan qoplangan plasebo tabletkalari tarkibida “sariq shaffov” bo‘yoq moddasi mavjud bo‘lib, bu allergik reaksiyalar kuchayishiga sabab bo‘lishi mumkin.

Dimia® tarkibida 0,070 mg soya lesitini ham mavjud. Agar Sizda yer yong‘oqqa yoki soyaga allergiya bo‘lsa, ushbu dori vositasini qabul qilmang.

  1. Dimia® preparatini qanday qabul qilinadi?

Preparatni har doim shifokor tavsiyalariga qat‘iy muvofiqlikda qabul qiling.

Agar Sizda savollar yuzaga kelsa, shifokor yoki farmasevt bilan maslahatlashing.

Har bir kontur yacheykali o‘ramda 24 ta oq rangli faol tabletka va 4 ta yashil rangli  plasebo tabletkalari mavjud.

Dimia® preparatining rangli tabletkalari muayyan tartibda joylashtirilgan. O‘ramda 28 ta tabletka mavjud. Dimia® preparat tabletkasini, zarur hollarda, ustidan kam miqdorli suv ichish orqali har kuni bittadan qabul qiling. Tabletkalarni ovqat iste‘molidan qat‘iy nazar, biroq har kuni bir xil vaqtda qabul qilish kerak.

Tabletkalarni adashtirib qo‘ymang: birinchi 24 kun mobaynida oq rangli tabletkalarni qabul qiling, shundan so‘ng qolgan 4 kunda – yashil rangli tabletkalarni qabul qiling. Siz tabletkalar qabul qilinishini oldingi qabul tugashi bilan shu zahoti yangi o‘ramdagi tabletkalardan boshlashingiz kerak (24 ta oq rangli faol tabletka va 4 ta yashil rangli  plasebo tabletkalari). Shunday qilib, ikkita o‘ramdagi tabletkalarni qabul qilish o‘rtasida uzilish bo‘lmasligi kerak.

Tabletkalar tarkibi bir-biridan farq qilishi tufayli qabul qilishni o‘ramda aynan “start” deb belgilangan birinchi tabletkadan boshlash kerak, so‘ngra tabletkalarni har kuni qabul qilib borish kerak. Qabul qilish to‘g‘ri tartibi uchun o‘ramda strelka bilan qayd etilgan raqamlar va yo‘nalishga rioya qiling.

O‘ramni tayyorlash

Tabletkalarning har kuni qabul qilinishini nazorat qilish uchun o‘ramda chizilgan strelkalarga rioya qiling.

Ushbu strelkalar bilan tabletkalarni qabul qilish tartibi ko‘rsatilgan.

4 ta yashil rangli  plasebo tabletkalarini qabul qilish vaqtida (plasebo kunlari) qon ketishi boshlanishi kerak (“bekor qilish qon ketishi” deb nomlanadi). Odatda, bu Dimia® preparatining oq rangli faol tabletkalaridan so‘nggisi qabul qilingandan keyingi 2 yoki 3-kunda boshlanadi. Siz o‘ramdagi yashil rangli tabletkalardan so‘nggisini qabul qilishingiz bilan qon ketishi to‘xtaganligi yoki to‘xtamaganligidan qat‘iy nazar, navbatdagi qadoq idishdagi tabletkalarini qabul qilishni boshlashingiz kerak. Bu shuni anglatadiki, Siz har bir yangi o‘ramdagi tabletkalarni qabul qilishni haftaning oldingi tabletkalarni qabul qilish boshlangan kunida boshlashingiz kerak, shunda qon ketishini bekor qilish har oyning muayyan bir kunida boshlanadi.

Agar Siz Dimia® preparatini tavsiflangan sxema bo‘yicha qabul qilayotgan bo‘lsangiz, Siz plasebo tabletkalarini qabul qilayotgan 4 kunlik davrda ham homiladorlikdan himoyalangan bo‘lasiz.

Birinchi o‘ramdagi tabletkalarni qabul qilishni qachon boshlash mumkin?

 

  • Agar Siz oldingi oyda gormonal kontraseptivlarni qabul qilmagan bo‘lsangiz

Dimia® preparatini qabul qilishni siklning birinchi kunida (hayzning birinchi kunida) boshlang. Agar Siz Dimia® preparatini qabul qilishni hayzning birinchi kunida boshlagan bo‘lsangiz, Siz shu vaqtning o‘zida homiladorlikdan himoyalangan bo‘lasiz. Shuningdek, Siz preparatni qabul qilishni siklning 2-kunidan 5-kunigacha davrda boshlashingiz mumkin, bunday holatda Siz birinchi 7 kun mobaynida qo‘shimcha kontrasepsiya usullari (masalan, prezervativ)dan foydalanishingiz kerak.

  • Majmuaviy gormonal kontraseptivlardan qin halqasi yoki transdermal plastirga o‘tishda

Siz Dimia® preparatini qabul qilishni oldingi kontraseptiv preparatning so‘nggi faol (tarkibida faol ta‘sir ko‘rsatuvchi modda mavjud) tabletka qabul qilingandan keyingi kundan va tanaffus tugagan kundan kechiktirmay (yoxud oldingi o‘ramdagi so‘nggi faol bo‘lmagan tabletka qabul qilingandan keyin) boshlashingiz mumkin.

Qin halqasi yoki transdermal plastirdan o‘tishda shifokor bilan maslahatlashish kerak.

  • Tarkibida faqat progestagen («mini-pili», in‘eksiyalar, implantlar) mavjud boshqa preparatlaridan yoki ichki bachadon tizimining (IBT) ajralib chiqadigan progestagenidan o‘tishda

Agar Siz «mini-pili» qabul qilayotgan bo‘lsangiz istalgan kunda (implantat yoki IBTning ajralib chiqadigan progestagenidan foydalanilganda – ular olib tashlanadigan kuni, in‘eksiya preparatlari qabul qilingandan so‘ng – navbatdagi ukol (in‘eksiya) qilinadigan kuni) Dimia® preparatini qabul qilishga o‘tishingiz mumkin, biroq ushbu barcha holatlarda tabletkalarni qabul qilishning birinchi 7 kun mobaynida qo‘shimcha kontrasepsiya usullari (masalan, prezervativ)dan foydalanishingiz tavsiya etiladi.

  • Beixtiyor abortdan so‘ng

Shifokor maslahatlariga rioya qiling.

  • Bola tug‘ilgandan so‘ng

Bola tug‘ilgandan so‘ng Siz 21-28 kundan keyin Dimia® preparatini qabul qilishni boshlashingiz mumkin. Agar Siz 28 kundan keyin Dimia® preparatini qabul qilishni boshlagan bo‘lsangiz, Dimia® preparatini qabul qilishning birinchi 7 kuni mobaynida to‘siqli usul (masalan, prezervativ)dan foydalanishingiz kerak.

Agar bola tug‘ilgandan so‘ng Siz Dimia® preparatini qabul qilish boshlangungacha (tiklangungacha) jinsiy aloqada bo‘lsangiz, Siz ushbu preparatni qabul qilishni boshlashdan oldin homilador emasligingizga ishonch hosil qilishingiz va birinchi hayz qon ketishini kutishingiz kerak.

  • Agar Siz bola emizayotgan bo‘lsangiz va tug‘ishdan so‘ng Dimia® preparatini qabul qilishni boshlamoqchi (tiklamoqchi) bo‘lsangiz

“Homiladorlik va emizish davri” bo‘limida “Bola emizish” kichik bo‘limiga qarang.

Preparatni qabul qilishni qanday boshlash kerakligiga ikkilansangiz shifokorga murojaat qiling.

  • Agar Siz Dimia® preparatini tayinlangan dozasidan ko‘proq qabul qilgan bo‘lsangiz

Dimia® preparatining haddan tashqari yuqori dozasini qabul qilishning jiddiy va xavfli oqibatlari to‘g‘risida ma‘lumotlar yo‘q.

Agar Siz bir necha tabletkani birdaniga qabul qilgan bo‘lsangiz, Sizda ko‘ngil aynishi va qayt qilish holatlari paydo bo‘lishi mumkin. Yosh qizlarda qindan qon ketish boshlanishi mumkin.

Agar Siz Dimia® preparatining haddan tashqari ko‘p tabletkalarini qabul qilgan bo‘lsangiz yoki tabletkalarni bola tasodifan yutib yuborgan taqdirda, maslahat uchun shifokorga yoki farmasevtga murojaat qiling.

  • Agar Siz Dimia® preparatini qabul qilishni unutib qo‘ysangiz

O‘ramning to‘rtinchi qatoridagi so‘nggi 4 ta tabletka – plasebo tabletkalari. Agar Siz ulardan birini qabul qilishni unutib qo‘ysangiz, bu Dimia® preparatining samaradorligiga hech qanday ta‘sir ko‘rsatmaydi. Unutib o‘tkazib yuborilgan plasebo tabletkalarini oddiygina tashlab yuborish mumkin. Agar Siz oq rangli faol tabletka (blister o‘ramda 1-24 ta tabletka)ni qabul qilishni unutgan bo‘lsangiz, quyidagilarga amal qilish kerak:

– agar Siz 24 soatdan kamroq vaqt kechga qolsangiz, kontraseptiv himoya pasaymaydi. Tabletkani qabul qilishni o‘tkazib yuborganingiz yodingizga tushishi bilan qabul qiling, kelgusida tabletkalarni ro‘yxat bo‘yicha qabul qiling;

– agar Siz 24 soatdan ko‘proq vaqt kechga qolsangiz, kontraseptiv himoya pasayishi mumkin. Qanchalik ko‘p tabletkani o‘z vaqtida qabul qilishni unutib qo‘ygan bo‘lsangiz, homiladorlik boshlanishi xavfi shunchalik yuqori bo‘ladi;

Agar Siz o‘ramning boshidagi yoki oxiridagi oq rangli tabletkani o‘z vaqtida qabul qilishni unutib qo‘ygan bo‘lsangiz, homiladorlikdan himoya pasayish xavfi shunchalik yuqori bo‘ladi. Shu tufayli Siz muayyan qoidalarga amal qilishingiz kerak (shuningdek, diagrammaga qarang):

  • O‘ramdagi bittadan ko‘proq tabletkani qabul qilish unutib qo‘yilgan

Shifokor bilan maslahatlashing.

  • 1-7 kun mobaynida (birinchi qator) bitta tabletkani qabul qilish unutib qo‘yilgan

Tabletkani qabul qilishni o‘tkazib yuborganingiz yodingizga tushishi bilan qabul qiling, bunda Siz birdaniga ikkita tabletkani qabul qilishingizga to‘g‘ri kelsa ham, so‘ngra tabletkalarni ro‘yxat bo‘yicha odatdagi vaqtda qabul qiling va kelgusi 7 kun mobaynida qo‘shimcha kontrasepsiya usullari (masalan, prezervativ)dan foydalaning. Agar Siz tabletkani qabul qilishni o‘tkazib yuborgungacha haftada jinsiy aloqa qilgan bo‘lsangiz, homilador bo‘lish xavfi mavjudligini tushunishingiz kerak. Bu holatda shifokor bilan maslahatlashing.

 8-14 kun mobaynida (ikkinchi qator) bitta tabletkani qabul qilish unutib qo‘yilgan

Tabletkani qabul qilishni o‘tkazib yuborganingiz yodingizga tushishi bilan qabul qiling, bunda Siz birdaniga ikkita tabletkani qabul qilishingizga to‘g‘ri kelsa ham, so‘ngra tabletkalarni ro‘yxat bo‘yicha odatdagi vaqtda qabul qiling. Kontraseptiv himoya pasaymagan va qo‘shimcha kontrasepsiya usullaridan foydalanish shart emas.

  15-24 kun mobaynida (uchinchi qator) bitta tabletkani qabul qilish unutib qo‘yilgan

Sizda ikkita variant mavjud:

  1. Tabletkani qabul qilishni o‘tkazib yuborganingiz yodingizga tushishi bilan qabul qiling, bunda Siz birdaniga ikkita tabletkani qabul qilishingizga to‘g‘ri kelsa ham, so‘ngra tabletkalarni ro‘yxat bo‘yicha odatdagi vaqtda qabul qiling. Yashil rangli plasebo tabletkalarini qabul qilish o‘rniga yangi qadoq idishdagi oq rangli tabletkalarni qabul qilishni boshlang (“start” kuni bir-biridan farq qiladi).

Hayz taxminan ikkinchi o‘ram oxiriga borib, Siz yashil rangli tabletkalarni qabul qilayotganingizda boshlanadi. Biroq Siz ikkinchi o‘ramdagi tabletkalarni qabul qilayotgan vaqtda kuchsiz yoki hayzsimon qon ketishi paydo bo‘lishi ehtimoli ham mavjud.

  1. Bundan tashqari, Siz joriy o‘ramdagi oq rangli tabletkalarni qabul qilishni to‘xtatishingiz va 4 ta yashil rangli tabletkalarni qabul qilishga o‘tishingiz mumkin (yashil rangli tabletkalarni qabul qilishdan oldin Siz qabul qilishni unutib qo‘ygan kunni albatta yozib qo‘ying). Agar Siz odatdagidek haftaning aynan shu kunida yangi o‘ramdagi tabletkalarni qabul qilishni boshlamoqchi bo‘lsangiz, 4 kundan kamroq muddat plasebo tabletkalarini qabul qiling.

Agar Siz yuqorida tavsiflangan usullardan biriga amal qilsangiz, istalmagan homiladorlikdan himoyalangan bo‘lasiz.

  • Agar Siz o‘ramdagi biror-bir tabletkani qabul qilishni unutib qo‘ygan bo‘lsangiz va plasebo tabletkalarini qabul qilish davrida qon ketish bo‘lmasa, bu Sizda homiladorlik boshlanganligini anglatadi. Navbatdagi o‘ramdan tabletkalar qabul qilishni boshlashdan oldin shifokor bilan maslahatlashing.

 

Agar Sizda qayt qilish yoki yaqqol diareya bo‘lsa nima qilish kerak?

Agar oq rangli faol tabletkalar qabul qilingandan so‘ng 3-4 soat mobaynida qayt qilish yoki kuchli diareya boshlansa, tabletkalarning ta‘sir ko‘rsatuvchi moddalari to‘liq singib ketmayotganligi xavfi mavjud. Ushbu vaziyat tabletkalarni qabul qilish o‘tkazib yuborilgan holatni eslatadi. Qayt qilish yoki diareyadan so‘ng Siz imkon qadar tezroq zaxira qadoq idishdan oq rangli bitta tabletkani qabul qilishingiz kerak. Imkon qadar uni rejalashtirilgan qabul qilishdan so‘ng 24 soatdan kechiktirilmagan holda qabul qilishga intiling. Agar buning imkoni bo‘lmasa yoki 24 soatdan o‘tib ketgan bo‘lsa, “Agar Siz Dimia® preparatini qabul qilishni unutib qo‘ygan bo‘lsangiz” bo‘limidagi maslahatlarga rioya qiling.

Hayz kelishini kechiktirish uchun nimalarni bilish kerak?

Garchi bu tavsiya qilinmasada, Siz to‘rtinchi qatordagi yashil tabletkalar qabul qilinishini o‘tkazib yuborish va Dimia® preparatining yangi o‘ramdagi tabletkalarni qabul qilishni boshlash orqali hayz kelishini kechiktirishingiz mumkin. Dimia® preparatining yangi o‘ramdagi tabletkalarni oxirigacha qabul qilish mumkin. Siz ikkinchi o‘ramdagi tabletkalarni qabul qilayotgan vaqtda kuchsiz yoki hayzsimon qon ketish holati paydo bo‘lishi mumkin. Ikkinchi o‘ram oxirida to‘rtinchi qatordagi 4 ta yashil rangli tabletkalarni qabul qiling. So‘ngra yangi o‘ramdagi tabletkalarni qabul qilishni boshlang.

Hayz sikli rejimiga aralashishdan oldin maslahat uchun shifokorga murojaat qiling.

 

Hayz sikli birinchi kunini o‘zgartirish uchun nimalarni bilish kerak

Agar Siz tabletkalarni ko‘rsatmalar bo‘yicha qabul qilayotgan bo‘lsangiz, Sizda qon ketishi plasebo qabul qilish davrida boshlanadi. Agar ushbu kunni o‘zgartirish zarur bo‘lsa, Siz plasebo yashil tabletkalari sonini qisqartirishingiz mumkin (biroq zinhor oshirmaslik kerak – 4 ta tabletka – bu maksimum!). Masalan, agar plasebo tabletkalarini qabul qilish juma kuni boshlansa, Siz esa ushbu kunni seshanba kuniga o‘zgartirishingiz kerak bo‘lsa (ya‘ni 3 kun ertaroq), Siz yangi qadoq idishdagi tabletkalarni qabul qilishni odatdagidan 3 kun oldin boshlashingiz kerak. Ushbu vaziyatda Sizda qon ketishi bo‘lmasligi mumkin. Kelgusida kuchsiz yoki hayzsimon qon ketish holati paydo bo‘lishi mumkin.

Agar Siz nima qilish kerakligiga ikkilansangiz shifokorga murojaat qiling.

  • Agar Siz Dimia® preparatini qabul qilishni to‘xtatgan bo‘lsangiz

Siz Dimia® preparatini qabul qilishni istalgan vaqtda to‘xtatishingiz mumkin. Agar Siz hamon homilador bo‘lishni istamasangiz, tug‘ilishni nazorat qilishning boshqa ehtimoliy usullari to‘g‘risida shifokor bilan maslahatlashing.

Agar Siz homilador bo‘lishni rejalashtirayotgan bo‘lsangiz, Dimia® preparatini qabul qilishni to‘xtating va homilador bo‘lishdan oldin hayz kelishini kuting. Siz mo‘ljallangan tug‘ish sanasini aniq hisoblab chiqishingiz mumkin.

Agar Sizda qo‘shimcha savollar yuzaga kelsa, maslahat uchun shifokorga yoki farmasevtga murojaat qiling.

 

  1. Ehtimoliy nojo‘ya samaralar

Barcha preparatlar kabi Dimia® ham, garchi hammada yuz bermasada, nojo‘ya samaralarni chaqirishi mumkin. Agar Sizda nojo‘ya samaralar, jumladan, aniq ifodalangan va uzoq vaqt saqlanib qoladigan ta‘sirlar paydo bo‘lsa yoki Sizning ahvolingiz o‘zgarsa va bu Dimia® preparatini qabul qilish tufayli yuz berdi deb o‘ylasangiz, marhamat, shifokor bilan maslahatlashing.

Venalarda tromb (vena tromboemboliyasi) yoki arteriyalarda (arterial tromboemboliya) paydo bo‘lishi yuqori xavfi majmuaviy gormonal kontraseptivlarni qabul qilayotgan barcha ayollarda mavjud bo‘ladi. Majmuaviy gormonal kontraseptivlarni qabul qilish bilan bog‘liq ehtimoliy xavflar to‘g‘risida batafsilroq ma‘lumotlar “Dimia® preparatini qabul qilishgacha nimalarni bilish kerak” 2-bo‘limida taqdim qilingan.

Quyida drospirenon/etinilestradiolni qabul qilish bilan bog‘liq nojo‘ya samaralar ro‘yxati taqdim qilingan:

Tez-tez uchraydigan nojo‘ya samaralar (taxminan 10 pasientdan 1 da uchraydi):

  • kayfiyat o‘zgarishi;
  • bosh og‘rig‘i;
  • ko‘ngil aynishi;
  • sut bezlaridagi og‘riq, oylik hayz bilan bog‘liq muammolar, masalan, nomuntazam sikl, oylik hayz kelmasligi.

Tez-tez uchramaydigan nojo‘ya samaralar (taxminan 100 pasientdan 1 da uchraydi):

  • depressiya, asabiylashish;
  • bosh aylanishi, qo‘l-oyoqlarda sanchiq hissi, uyqusizlik, migren;
  • venalarning varikoz kengayishi, arterial qon bosim oshishi;
  • qorindagi og‘riq, qayt qilish, ovqatni hazm qilish buzilishi, ichakda ortiqcha gaz yig‘ilishi, oshqozon yallig‘lanishi, diareya;
  • akne, qichima, toshma;
  • og‘riq, masalan, bel, qo‘l-oyoqlar og‘rig‘i, mushak spazmalari;
  • vaginal zamburug‘ infeksiyasi, tos sohasidagi og‘riq, ko‘krak kattalashishi, sut bezlaridagi xavfsiz tugunchalar, bachadon/vaginal qon ketish (odatda, terapiya davom etishiga qarab yo‘qoladi), qindan ajratmalar, oqimlar, qin yallig‘lanishi (vaginit), hayz bilan bog‘liq muammolar, og‘riqli, qisqa yoki haddan tashqari ko‘p hayoz kelishi, qin qurushi, anomal servikal mazok, libido pasayishi;
  • bemadorlik hissi, ko‘p terlash, suyuqlik tutilishi;
  • tana vazni og‘irlashishi.

Kam uchraydigan nojo‘ya samaralar (taxminan 1000 pasientdan 1 da uchraydi):

  • kandidoz (zamburug‘ infeksiyasi);
  • qon tarkibida eritrositlar soni kamayishi (anemiya), qon tarkibida trombositlar soni ko‘payishi (trombositemiya);
  • allergik reaksiyalar;
  • gormonal (endokrin) buzilishlar;
  • ishtaha kuchayishi, ishtaha yo‘qolishi, qon tarkibida kaliyning anomal yuqori konsentrasiyasi, qon tarkibida natriyning anomal past konsentrasiyasi;
  • orgazmni his qilish imkoniyati yo‘qligi, uyqusizlik;
  • behuzurlik, tremor;
  • ko‘z kasalliklari, masalan, qovoq yallig‘lanishi, ko‘z qurishi;
  • yurakning haddan tashqari tez urishi;
  • venalar yallig‘lanishi, hushdan ketish;
  • burundan qon oqishi;
  • qorin kattalashishi, yo‘g‘on ichak tomonidan kasallik, qorin shishishi, oshqozon churrasi, og‘iz bo‘shlig‘i zamburug‘ infeksiyasi, ich qotishi, og‘iz qurishi;
  • o‘t pufagi sohasidagi og‘riq va o‘t oqimlari, o‘t pufagi yallig‘lanishi;
  • teridagi sariq-jigar rang dog‘lar, ekzema, soch to‘kilishi, terining aknasimon yallig‘lanishi, teri qurishi, terining tugunli yallig‘lanishi, sochning ortiqcha o‘sishi, teri kasalliklari, teridagi tortilib kengayishlar, teri yallig‘lanishi, fotosezuvchanlik, teri tugunlari;
  • jinsiy aloqada qiyinchilik yoki og‘riq, qin yallig‘lanishi (vulvovaginit), jinsiy aloqadan keyingi qon ketish, bekor qilish qon ketishi, sut bezlari kistalari, sut bezlari to‘qimalarida hujayralar miqdori oshishi (giperplaziya), sut bezlaridagi xavfli tugunchalar, bachadon shilliq bo‘yni anomal o‘sishi, to‘qimalar, bachadon qoplanuvchi bo‘shlig‘ining qisqarishi yoki yupqalanishi, tuxumdonlar kistalari, bachadon kattalashishi;
  • o‘zini umumiy yomon his qilish;
  • tana vazni yo‘qotilishi;
  • venalar va arteriyalarda xavfli tromblar, masalan: oyoq yoki tovonda (chuqur venalar trombozi), o‘pkalarda (o‘pka arteriyasining tromboemboliyasi);
  • miokard infarkti;
  • insult,
  • mini-insult yoki miyada qon aylanishining vaqtincha buzilishi (tranzitor ishemik hujum);
  • jigar, oshqozon/ichak, buyrak yoki ko‘zdagi tromblar.

Agar Sizda boshqa xavf omillari bo‘lsa tromboz rivojlanish ehtimoli kuchayadi (2-bo‘limda tromb paydo bo‘lish xavfini kuchaytiradigan holat to‘g‘risida ma‘lumotlar taqdim qilingan, shuningdek tromboz simptomlari qayd etilgan).

Quyidagi nojo‘ya samaralar qayd etilgan, biroq ularning tez-tezligi mavjud ma‘lumotlar bo‘yicha baholash mumkin emas:

– o‘ta sezuvchanlik (ta‘sirchanlik);

– ko‘p shaklli eritema (qizil dog‘li toshma yoki “nishon” ko‘rinishidagi yaralar).

  1. Dimia® plyonka qobig‘i bilan qoplangan preparatini qanday saqlash kerak

Yorug‘likdan himoya qilish uchun original o‘ramda 25 °C darajadan yuqori bo‘lmagan haroratda saqlansin.

Bolalar ololmaydigan joyda saqlansin.

O‘ramda qayd etilgan yaroqlilik muddati (oy, yil) tugagandan so‘ng preparatdan foydalanilmasin. Qayd etilgan oyning so‘nggi kuni yaroqlilik muddati tugaydigan sana hisoblanadi.

Ushbu dori vositasini kanalizasiyaga tashlab yuborish yoki maishiy chiqindilar bilan birga utilizasiya qilish mumkin emas. Ushbu qabul qilish tugagan dori vositasi qoldiqlaridan qanday xalos bo‘lish kerakligini farmasevtdan aniqlab oling. Ushbu chora-tadbirlar atrof-muhitni himoya qilish maqsadida qo‘llaniladi.

  1. O‘ram tarkibi va boshqa ma‘lumot

Dimia® plyonka qobiq bilan qoplangan preparat tabletkalari tarkibida quyidagi moddalar mavjud:

  • Faol moddalar: har bir oq rangli tabletka 3,000 mg drospirenon va 0,020 mg etinilestradiol saqlaydi.
  • Boshqa moddalar:

Plyonka qobiq bilan qoplangan oq rangli faol tabletkalar:

Tabletka yadrosi:

– laktoza monogidrati;

– makkajo‘xori kraxmali;

– o‘tajelatinlangan kraxmal (makkajo‘xori kraxmali);

– makrogol PVA-PEG kopolimer;

– magniy stearati.

Plyonka qobig‘i (Opadray II oq rangli):

– yarim vinil spirti;

– titan dioksidi (E171);

– makrogol 3350;

– talk;

– lesitin (soya).

Plyonka qobiq bilan qoplangan yashil rangli plasebo tabletkalari:

Tabletka yadrosi:

– mikrokristallik sellyuloza;

– laktoza, suvsiz;

– o‘tajelatinlangan kraxmal (makkajo‘xori kraxmali);

– magniy stearati;

– suvsiz kolloidli kremniy dioksidi.

Plyonka qobig‘i (Opadray II yashil rangli):

– yarim vinil spirti;

– titan dioksidi (E171);

– makrogol 3350;

– talk;

– indigokarmin alyuminiy lak (Ye132);

– xinolin sariq rangli alyuminiy lak (Ye104);

– temir oksidi (Ye172);

– “shaffov” sariq rangli alyuminiy lak (Ye110).

Plyonka qobiq bilan qoplangan Dimia®  preparat tabletkalari qanday ko‘rinishga ega va o‘ram tarkibi:

Faol moddalar: oq yoki deyarli oq rangli, dumaloq, ikki tomoni qavariq, plyonka qobiq bilan qoplangan, taxminan 6 mm diametrli tabletkalar; tabletkaning bir tomonida “G73” gravirovkasi bor.

Plasebo tabletkalari: yashil rangli, dumaloq, ikki tomoni qavariq, plyonka qobiq bilan qoplangan, taxminan 6 mm diametrli tabletkalar.

Blisterda (PVX/PE/PVDX – alyuminiy folga) 24 tabletka va 4 ta plasebo tabletkalari.

1 yoki 3 ta blister tibbiyotda qo‘llash bo‘yicha yo‘riqnoma bilan birga karton qutida. Karton qutiga blisterni saqlash uchun kartondan ishlangan tekis futlyar joylashtirilgan.

Dorixonalardan berish tartibi

Analoglar
Barcha dori vositalari >

Chiqarish shakllari

O'xshash dori vositalari

Dimia dori vositasi O'zbekiston dori vositalari reestrida ro'yxatdan o'tganmi?
Ha, preparat O'zbekiston dori vositalari reestrida ro'yxatdan o'tgan.
Dori vositasini saqlash shartlari qanday?
  • хранить при комнатной температуре 15-25 градусов
  • беречь от детей
  • хранить в защищенном от света месте

    • Mahsulot bo'yicha savolingiz bormi?

    Savol qoldirish

    Fikr qoldirish
    Baho:
                  
    Matnni kiriting

    Ismingiz
    Fikr-mulohazangiz moderator tekshiruvidan so'ng nashr etiladi
    «Dimia» dorisining ta'rifi Apteka.uz saytida qisqartilirlgan yoki rasmiy ko'rsatmalar bilan to'ldirilgan bo'lishi mumkin. Dorini sotib olishdan va ishlatishdan oldin siz shifokor bilan maslahatlashib, ishlab chiqaruvchi tomonidan tasdiqlangan izoh bilan tanishishingiz kerak.
    ×
    ×

    Alifbo bo'yicha dori vositalar ro'yxati

    • A
    • B
    • D
    • E
    • F
    • G
    • H
    • I
    • J
    • K
    • L
    • M
    • N
    • O
    • P
    • Q
    • R
    • S
    • T
    • U
    • V
    • X
    • Y
    • Z
    • Ch
    • Sh
    • 0-9